इटहरी। प्रदेश १ को व्यापारिक सहर इटहरीमा होटलहरू सफाइका हिसाबमा अझै सुधार हुन सकेका छैनन् । खाद्य प्रविधि तथा गुण नियन्त्रण डिभिजन कार्यालय इनरुवाले गरेको अनुगमनमा इटहरीमा सञ्चालित अधिकांश होटलहरूका भान्सा फोहोर भेटिएको छ ।
कोरोना महामारीपछि पहिलोपटक इटहरीको होटल अनुगमन गर्ने क्रममा अधिकांश होटलको भान्सामा नै समस्या भएको भेटिएको डिभिजन कार्यालयका प्रमुख काशीनाथ घिमिरेले जानकारी दिए । त्यस्ता होटललाई सुधारका लागि निर्देशन दिइएको छ ।
दुई दिनमा इटहरीका १९ वटा होटल तथा रेष्टुरेण्ट अनुगमन गरिएको थियो । त्यसमध्ये न्यू पूर्वाञ्चल होटल र आँपगाछीको बगान होटलको कागजपत्रसमेत फेला नपरेको उनले जानकारी दिए । उनले भने, ‘किचन पनि मापदण्डअनुसार नभएकाले सुधार्ने मौका दिएका छौं ।’
खाद्य स्वच्छताका आधारमा केही होटललाई स्तरीकरण पनि गर्ने काम गरिएको छ । होटल रेष्टुरेण्टको स्तरीकरण गर्नेसम्बन्धी निर्देशिका २०७४ बमोजिम होटल अनुगमन गर्दा केही होटललाई वर्गीकरण गरिएको प्रमुख घिमिरेले बताए ।
‘इटहरीको अति उत्तम होटलमा होटल व्यवसायी सङ्घ इटहरीका अध्यक्ष जीवन पराजुलीले सञ्चालन गरेको होटल इन टुरिष्ट भेटियो’ प्रमुख घिमिरेले भने, ‘त्योसँगै इटहरीका ८ वटा होटलले ख वर्गको र ८ वटै होटलले ग वर्गको स्टिकर पाएका छन् ।’ घिमिरेका अनुसार अतिउत्तमलाई ‘क’ वर्ग, उत्तमलाई ‘ख’ वर्ग, सन्तोषजनकलाई ‘ग’ वर्ग र सामान्य तथा सुधार गर्नुपर्नेलाई ‘घ’ वर्गमा राखिनेछ ।
इटहरी उपमहागनरपालिकाका कर शाखा प्रमुख नवीन भट्टराईले निर्देशिकाले तोकेका ५० वटा सूचकमा रहेर होटलहरूको अनुगमन गरेको जानकारी दिए । उनले प्रत्येक सूचकमा दुई नम्बर दिइने र त्यसको आधारमा नै होटल तथा रेष्टुरेण्टको स्तर तोकिने जानकारी दिए ।
‘हामीले विभिन्न ५० वटा सूचकमा रहेर होटलको अनुगमन गरेका छौँ । प्रत्येक सूचकमा हामी दुई–दुई नम्बर दिन्छौँ । जुन होटलको कुल नम्बर ९० भन्दामाथि आउँछ, त्यसलाई हामीले अतिउत्तम अर्थात् ‘क’ वर्गमा राखेका हौं ।’
होटल व्यवसायी सङ्घ इटहरीका अध्यक्ष जीवन पराजुलीले अनुगमन समय–समयमा हुँदा आफूहरूले पनि सुधार गर्ने मौका पाउने बताए । ‘अनुगमनलाई हामी सकारात्मक रूपमा लिन्छौंँ । पर्यटकहरुलाई आकर्षण गर्न होटलहरूको भान्सासमेत सुधार हुनुपर्ने उनको तर्क छ ।
पर्यटन तथा जिल्ला होटल व्यवसायी सङ्घ सुनसरीका अध्यक्ष तेजबहादुर पुरीले होटल अनुगमन गर्दा सबै होटलहरूलाई फाइदा पुग्ने बताए । जिल्लाका सबै होटलहरूमा अनुगमन गदै स्तरीकरण हुँदा व्यावसायीहरूले पनि सतर्कता अपनाउने उनको भनाइ थियो ।
Discussion about this post