सुनसरी प्रहरीको लापरबाही र आर्थिक प्रलोभनमा प्रहरी

सुनसरी – छिमेकी भारतसँग खुल्ला सिमा जोडिएको तराईको उच्च सुरक्षा संवेदनशीलता रहेको सुनसरीमा तस्करीका घटना रोकिएको छैन । भारतसँग खुल्ला सिमा जोडिएको सुनसरीबाट पेट्रोलियम पदार्थको तस्करी भारततर्फ हुनेक्रम रोकिएको छैन ।

नेपालमा महिनामै ४ पटक डिजल र पेट्रोलको भाउ वृद्धि भएर उपभोक्ता चर्को मूल्य तिर्न बाध्य हुँदा समेत सुनसरीको भारतसँग सिमा जोडिएका पेट्रोल पम्पहरुमा आवश्यक परिमाणमा डिजल पेट्रोल नपाईने गुनासो स्थानीयको छ ।

पछिल्ला केही महिना यता सुनसरी प्रहरीको लापरबाही र आर्थिक प्रलोभनमा प्रहरी लागेका कारण पेट्रोलियम पदार्थ मात्र नभई केराउ,कपडा तथा अन्य उपभोग्य सामाग्रीहरुको समेत तस्करी बढेको देवानगंजका स्थानीय बासिन्दा माहिर हुसेन बताउछन ।

खुल्ला सिमा जोडिएको सुनसरीमा प्रहरीसँगको मिलेमतो बिना डिजल पेट्रोल भारत निकासी असंभव भएको हरिनगरा निवासी पंकज गुप्ताको दाबी छ । आयल निगमबाट दैनिक इन्धन खरिद गरेर ल्याउने तर पम्प बन्द रहनुको अर्थ प्रहरीसँगकै मिलेमतोमा भएको तस्करी हो गुप्ताले भने ।

यसअघि पनि सुनसरीका विभिन्न नाका हुँदै सुनसरी प्रहरीकै मिलेमतोमा खुल्ला सिमा रहेको भारतबाट दैनिक उपभोग्य सामाग्री भन्सार छलेर तस्करी हुने गरेको र सुनसरी प्रहरी प्रमुख एसपी कमल थापा कमाउ धन्दामा लागेको भनी उनीमाथी अख्तियार दुरुपयोग अनुसन्धान आयोग र १ नं प्रदेश प्रहरी कार्यालय बिराटनगरले छुट्टाछुट्टै छानबीन समिति गठन गरेका थिए ।

अन्तर्राष्ट्रिय बजारमा दिनहुुँ पेट्रोलियम पदार्थको मूल्य वृद्धि भइरहेको र भारतीय आयल कर्पोरेसनबाट समेत बढेको मुल्यमा पेट्रोलियम पदार्थ खरिद गर्नुपरेकाले घाटा कम गर्न मूल्य बढाउनुपरेको तर्क नेपाल आयल निगमले गर्दै आएको छ ।

भारत सरकारले नेपालमा बिक्री वितरण गर्ने पेट्रोलियम पदार्थमा अनुदान दिएकाले भारतिय बजारमा भन्दा नेपाली बजारमा डिजल पेट्रोल सस्तो भएकाले तस्करी बढ्ने गरेको छ ।

केही महिनायता सुनसरी प्रहरी प्रमुख एसपी कमल थापाले आफ्ना घुमुवा प्रहरी प्रयोग गरि आर्थिक चलखेल गरेको भन्दै समाचार प्रकाशित भए पनि एसपी थापाले भने उक्त आरोपको खण्डन गर्दै आएका थिए ।

तर नेपाल सरकारका पुर्व सचिव भीम उपाध्याय समेतले दिनदहाडै सुनसरीबाट भारततर्फ डिजल पेट्रोल चोरीनिकासी हुँदै गरेको तस्बिर नै सामाजिक संजाल फेसबुकमा प्रकाशित गरेपछि सुनसरीबाट मिलेमतोमै व्यापक चोरी तस्करी बढ्ने गरेको तथ्य प्रमाणित भएको छ ।

पछिल्लो समय सुनसरीबाट भारततर्फ चोरी तस्करी बढेको बिषयमा प्रतिक्रिया लिदा प्रदेश नं १ का प्रहरी प्रमुख डिआईजी ईश्वरबाबु कार्कीले सिमाक्षेत्रमा हुने चोरीनिकाशीका घटनाका विषयमा आफु गम्भीर भएको र तस्करी नियन्त्रणका लागी कडा कदम चाल्ने प्रतिक्रिया दिए ।

किन हुन्छ इन्धनको भारततर्फ तस्करी

नेपाललाई पेट्रोलियम पदार्थ बिक्री गर्दा भारत सरकारले राजस्व छुट दिएका कारण भारतमा भन्दा नेपालमा डिजल पेट्रोलको मूल्य कम भएका कारण भारतीय सिमा क्षेत्रमा नेपालबाट इन्धन तस्करी हुने गरेको छ ।

प्रहरी प्रशासन सँगको मिलेमतोमा तस्करी मौलाउदा नेपाली उपभोक्ता भने आवश्यकता बमोजिम इन्धन नपाएर मर्कामा छन । खुलेआम ड्राम तथा जर्किनमा भरेर नेपालबाट भारततर्फ इन्धन लैजादा समेत तस्करीमा संलग्न व्यक्ती तथा इन्धन पक्राउ नपर्नु र सिमाक्षेत्रका पेट्रोल पम्पले माग बमोजिम इन्धन नदिनुले व्यापक तस्करी रहेको पुष्टि हुन्छ ।

राजस्वमा गिरावट,राज्यलाई करोडौ राजस्व घाटा

खुल्ला सिमा रहेका जिल्लाबाट दैनिक उपभोग्य बस्तु भन्सार छलेर ल्याउदा सरकारलाई राजस्वमा समेत नोक्सान हुने गरेको छ । चोरी निकाशी गरि दैनिक उपभोग्य सामानको बिगबिगीले बैधानिक रुपमा भन्सार तिरेर व्यापार व्यवसाय गर्ने व्यापारी समेत मर्कामा पर्ने गरेका छन ।