रात्रीकालिन बजार संचालनमा ढिलाई

इटहरी । रात्रीकालिन बजारमा इटहरी उपमहानगरको १९ लाख बजेट खरानी आर्थिक बर्ष २०७५ – ०७६ को इटहरी उपमहानगरको बजेटमा इटहरीमा रात्रीकालिन बजार लगाउने भन्दै ४० लाख बजेट बिनियोजन गरिएको थियो ।

समसाँझै बन्द हुने इटहरीको आर्थिक गतिविधि थप चलायमान बनाउन र कामकाजी मानिसको किनमेल थप सहज बनाउने उद्देश्यले संचालन गर्ने भनिएको रात्रीकालिन बजारमा हाल सम्म उपमहानगरको १९ लाख खर्च भईसक्दा पनि बजार लाग्ने छाँटकाँट देखिएको छैन ।

हालसम्म रात्रीकालिन बजार व्यवस्थापनका लागि आइतबारे देखि टेलिकम सम्म सडकको किनारामा रहेका रुख बिरुवाहरुमा रंग लगाउने,सडकमा जेब्रा क्रसिङ्ग निर्माण गर्ने,सिसि क्यामरा जडान गर्ने, सडकको किनारामा फलैँचा निर्माण कार्य सम्पन्न भईसकेको जानकारी रात्रीकालिन बजार व्यवस्थापन समितिका अध्यक्ष कृष्ण भट्टराईले जानकारी दिए ।

रात्रीकालिन बजार संचालनमा किन बिलम्ब भन्ने प्रश्नमा कोभिडको महामारीका कारण सोचे अनुरुप रात्रीकालिन बजार संचालन गर्न नसकिएको प्रतिक्रिया इटहरी उपमहानगरपालिकाकी उप – प्रमुख लक्ष्मी गौतमले दिईन ।

रात्रीकालिन बजार संचालन गर्न ४० लाख बजेट बिनियोजन भए पनि १३ लाख रुपैयाँ बजेट टेलिकम देखि नेपाली सेनाको पुर्वी पृतना हेडक्वाटर सम्म जाने बाटोको दायाँ बायाँ पार्किङ्ग टायल लगाउन प्रयोग भएको र कोरोना महामारीका कारण थप बजेटको व्यवस्था गर्न कठिन भएकाले रात्रीकालिन बजार संचालनमा ढिलाई भएको पाईएको छ ।

रात्रीकालिन बजार लगाउन ७५र७६ को बजेटमा ४० लाख छुट्याइएकोमा केही काम भए पनि प्रहरी बिटको स्थापना र शौचालयको व्यवस्थापन गर्न बाँकी रहेको र संभवत आउने दशैं अघि रात्रीकालिन बजार संचालन गर्ने सोच रहेको उप – प्रमुख गौतमले जानकारी दिईन ।

रात्रीकालिन बजार लगाउन इटहरी उपमहानगरपालिकाले आवश्यक ऐन समेत निर्माण गरिसकेको र ऐनमा उप – प्रमुखको संयोजकत्वमा इटहरी वडा ४ र ६ का वडाध्यक्ष,उद्योग वाणिज्य संघ इटहरीका प्रतिनिधि सहित २ जना स्थानीय रहने व्यवस्थापन समिती रहने जानकारी दिदै बजार संचालन भएपछी समिति कृयाशिल रहने जानकारी उप – प्रमुख गौतमले दिईन ।