प्रहरीमा उजुरी गर्दा सुनुवाई नगरेको गुनासो

इनरुवा । सुनसरीको देवानगञ्ज गाउँपालिका ४ कप्तानगञ्जकी २६ वर्षिया सिता मेहताले आफू र आफ्नो पती लक्ष्मण मेहतालाई छिमेकीले कुटपिट गरेको घाँटीमा गहिरो चोट पुर्याएको विषयमा प्रहरी प्रशासनमा उजुरी गर्दा सुनुवाई नगरेको गुनासो गरेको छ । सीमावर्ती गाउँ कप्तानगञ्जमा बासँ काट्ने निउँमा भएको विवाद पछि स्थानीय ललन मेहता र राजिव मेहताले सिता र लक्ष्मणलाई फागुन १८ गते निर्घात कुटपिट गर्नुका साथै घाँटी बटारिएर मार्ने प्रयास गरेको घटनाको दुई हप्ता वित्दा समेत प्रहरीले बेवास्ता गरेको पीडित परिवारको गुनासो छ । नजिकै प्रहरी भएर पनि समस्यामा बोलाउँदा नआएको र घटना भएपछि घाईतेलाई उपचारको व्यवस्था मिलाई दिन भन्दा उल्टै प्रहरीले गाली जलोज हप्काईदप्काई गरेको सीता मेहताको गुनासो रहेको छ ।
सुरुमा जग्गा र बासँको विषयमा न्यायिक समितिमा उजुरी परेको बेला विपक्षी ललन र राजीवले बासँ काटेको र आफ्नो खेतमा भएको बाँस किन काटेको भन्दा कुटेर घाईते बनाएको र आफूलाई समेत सारी खोलेर कुटपीट गरेको र लाछारपछार समेत गरेको भन्दै जिल्ला प्रशासन कार्यालय सुनसरीमा फागुन २५ गते उजुरी दिएकोमा प्रशासनले जिल्ला प्रहरी कार्यालय सुनसरीलाई हेर्न भनेकोमा हालसम्म सुनुवाई नभएको पीडितको गुनासो छ । पीडितले इलका प्रहरी विपक्षीसंग मिलेको र सगैं उठबस गरेको, लेनदेन समेत गरेको आरोप लगाउदै घटनाको विषयमा जिल्लामा फोन गर्दा सुनुवाई नगरेको गुनासो गरेको हो । पीडित मेहताले सत्य सेवा सुरक्षणमको मूलमन्त्र भित्र प्रहरी बस्नु पर्नेमा पीडित र पीडक नभनी पहुँच र लेनदेनका आधारमा सुनुवाई गर्ने गरेको आरोप समेत लगाएको छ । सीमा तस्करी देखी सानातिना समस्यालाई समाधान गर्नु भन्दा रकम लेनदेनमा मिलाउने गरेको र पीडितलाई थप पिडा दिने काम प्रहरीबाट भएको दावी गरे ।
यता सुनसरीका प्रहरी नायव उपरीक्षक नरेन्द्र कुमार कार्कीले पीडितले भने जस्तो नभएको र सामान्य विवादमा पनि ठूलो अस्पतालमा गएको विषयमा बुझ्ने प्रयास मात्रै भएको र दुवै पक्षलाई केहीबेर नियन्त्रणमा राखेर छाडीएको बताए । उनले ‘समाज प्रहरीको ऐना हो, समाजमा जस्ता मानिस छन् प्रहरीमा पनि छन’ भने– केहीले जनताको गुनासो नसुन्दैमा प्रहरी खराब हुँदैन । कतिपय अवस्थामा घटना एउटा र जाहेरी अर्कै खालको आउदाँ समस्या भएको र त्यस्ता मुद्दाले प्रहरीलाई समेत हैरान पारेको बताए ।