स्वास्थ्य कार्यक्रमसम्बन्धी तीन दिने तालिम सुरु

हरिनगर । सुनसरीको हरिनगर प्राथमिक स्वास्थ्य केन्द्र हरिनगरमा मातृ तथा बाल स्वास्थ्य सेवा समन्वयका लागि मोबाइल स्वास्थ्य कार्यक्रमसम्बन्धी तीन दिने तालिम सुरु भएको छ । हरिनगर गाउँपालिकाको समन्वय र करुणा फाउन्डेसनको सहकार्यमा हरिनगर प्राथमिक स्वास्थ्य केन्द्र हरिनगरमा आइतबारदेखि तीन दिने तालिम सुरु भएको हो ।अपाङ्गता रोकथाम तथा पुनस्र्थापना कार्यक्रमअन्तर्गत मातृ तथा बाल स्वास्थ्य सेवा समन्वयका लागि मोबाइल स्वास्थ्य कार्यक्रमसम्बन्धी हरिनगरका महिला स्वास्थ्य स्वंयसेविकाहरु तालिममा सहभागी भएका छन् ।

हरिनगर गाउँपालिकाका अध्यक्ष गफार अन्सारीले तालिमको उद्घाटन गर्दै हरिनगर गाउँपालिकामा करुणा फाउन्डेसनको सहकार्यमा अपाङ्गता भएका नवजात शिशु जन्म लिनुभन्दा पहिलेदेखि नै आवश्यतकाअनुसार चेकजाँच गर्ने, समयमा उपचार गर्ने, स्याहारसुसार गर्नेलगायतका विषयमा महिला स्वास्थ्य स्वंयसेविकाहरुले मोबाइलबाट अपडेट गर्ने कार्यमा सक्रिय रहने बताए ।महिला स्वास्थ्य स्वंयसेविकाहरुले तालिम लिएपछि वडामा गएर गर्भवती महिलाको तथ्याङ्क र उनीहरुमा देखा परेका समस्याहरुलाई मोबाइल एप्सबाट अपडेट गर्न सकिने अध्यक्ष अन्सारीले बताए । उनीहरुलाई तालिमबाट दक्ष बनाउने र पालिकामा मातृ तथा बाल स्वास्थ्य सेवाले समुदायमा सहयोग पुग्ने र मोबाइल स्वास्थ्य कार्यक्रमले पनि स्वंयसेविकालाई काम गर्न सजिलो हुने भएकाले कार्यक्रमलाई प्रभावकारी बनाउन सबैले सहयोग गर्न आवश्यक रहेको उनले बताए ।

आइतबार विश्व डाउन सिन्ड्रोम दिवसको अवसरमा अध्यक्ष अन्सारीले अपाङ्गता भएका व्यक्तिहरुलाई अपहेलना नगर्न आग्रह गर्दै उनीहरुलाई हेर्ने दृष्टिकोण फरक रहेकाले समान अधिकार दिलाउन आफू लागिरहेको बताए । समाजमा अपाङ्गता भएका व्यक्तिहरुलाई हौसला बढाउन आवश्यक रहेको र सपाङ्ग जस्तै अधिकार उनीहरुलाई दिनुपर्नेमा जोड दिएका थिए ।अपाङ्गता कार्ड वितरण गरिसकेको र उनीहरुका लागि निःशुल्क स्वास्थ्य शिविर पनि सम्पन्न गरिसकेको उनले बताए । सोही कार्यक्रमलाई सम्बोधन गर्दै हरिनगर गाउँपालिकाका प्रमुख प्रशासकीय अधिकृत भक्तबहादुर खड्काले तालिमको सफलताको शुभकामना व्यक्त गरेका थिए ।

तालिमबाट भएका सिकाइलाई व्यवहारमा उतार्न र समाजमा भएका समस्याहरुलाई न्यूनीकरणमा सबैले साथ र सहयोग गर्नुपर्नेमा जोड दिएका थिए । कार्यक्रममा हरिनगर गाउँपालिकाकी उपाध्यक्ष रिमझिमकुमारी भगत, शिक्षा शाखाका अजितकुमार मल्लिक, कार्यपालिका सदस्य सुशीलकुमार ठाकुर, हरिनगर गाउँपालिकाका नेपाली कांग्रेस सभापति शिवहरि श्रेष्ठ, युवा नेता नइम अन्सारी लगायतको सहभागिता रहेको थियो ।