सुरेन्द्र मेहता – इनरुवा । सुनसरीको भोक्राहा नरसिंह गाउँपालिका वार्ड नं. ७ मा अपाङ्गता भएका व्यक्तिहरुको स्वास्थ्य जाँच तथा परिचय पत्र वितरण गरिएको छ ।
भोक्राहा नरसिंह गाउँपालिका वार्ड नं. ७ मा रहेका अपाङ्गता भएका व्यक्तिहरुको पहिचान गरी उनीहरुको स्वास्थ्य जाँच तथा परिचय पत्र वितरण शिविर संचालन गरिएको भोक्राहा नरसिंह गाउँपालिका प्रमुख प्रशसकीय अधिकृत रामचरित्र मेहताले जानकारी दिए ।
भोक्राहा नरसिंह गाउँपालिकाका प्रमुख प्रशासकीय अधिकृत मेहताका अनुसार यस गाउँपालिकामा अपाङ्गता भएका व्यक्तिहरुको एकिन तथ्यांक नरहेको बताए ।
उनले भने अपाङ्गता भएका व्यक्तिहरुको एकिन तथ्यांक नहुँदा सक्कली अपाङ्गता हो की नक्कली अपाङ्गता हो हामीलाई छुट्टयाउन गाह्रोे हुँदै आएको थियो ।
अपाङ्गता भएका व्यक्तिहरुको लागि १ नं. प्रदेश बिराटनगरका समाजिक विकास मन्त्रालय र करुणा फाउण्डेसन सहकार्य तथा भोक्राहा नरसिंह गाउँपालिकाको आयोजनामा सक्कली र नक्कली अपाङ्गता भएको व्यक्ति पहिचान गर्न हौसला बढाएको बताए ।
भोक्राहा नरसिंह वार्ड नं. ७ का ९० जना अपाङ्गता भएका व्यक्तिहरुले लक्ष्य लिएपनि शिविरमा ८६ जना व्यक्तिहरुले मात्र स्वास्थ्य चेकजाँच गराएको स्वास्थ्य चौकी भोक्राहा नरसिंह ७ का इन्चार्ज रामाशंकर साहले जानकारी दिए ।
उनले भने स्वास्थ्य चेकजाँच गराएको ८६ जना व्यक्तिहरु मध्ये ३७ जना अपाङ्गता भएका व्यक्तिहरुलाई मात्र कार्ड वितरण गरिएको छ ।
यता भोक्राहा नरसिंह गाउँपालिका वार्ड नं. ७ का वडाध्यक्ष रामचन्द्र यादवले मंगलबार संचालन भएको अपाङ्गता भएका व्यक्तिहरुको स्वास्थ्य जाँच तथा परिचय पत्र वितरण शिविर कार्यक्रममा विहान ११ बजे देखी दिउँसो ४ बजे सम्म सक्कली र नक्कली अपाङ्गता छुट्टयाउन सहयोग गरेको स्वास्थ्य संयोजक आलम अंसारीको कथन छ ।
स्वास्थ्य संयोजक अंसारीले भने वडाध्यक्ष रामचन्द्र यादवले कार्यक्रम अवधिभर सेवाग्राहीहरुको प्राविधिक सहयोगमा कुनैपनि कन्जुस्याइँ नगरेको र सेवाग्राहीहरुको लागि निःशुल्क फोटोकापीको व्यवस्था समेत मिलाईदिएकोमा सेवाप्रदायक कर्मचारीहरु सजिलैसँग काम गर्न सकेको बताए ।
उनले भने भोक्राहा नरसिंह गाउँपालिका वार्ड नं. ७ मा रहेका विभिन्न प्रकारका सक्कली अपाङ्गता भएका व्यक्तिहरुको पहिचान गरी उनीहरुको सेवा सुविधामा पहुँच स्थापित गर्न मंगलबार स्वास्थ्य जाँचको शिविर संचालन गरी परिचय पत्र वितरण गरिएको बताए ।
सो कार्यक्रममा गाउँपालिकाकी उपाध्यक्ष पुनम कुमारी मेहता, भोक्राहा नरसिंह गाउँपालिका वार्ड नं.७ का वडाध्यक्ष रामचन्द्र यादव, गाउँपालिका अध्यक्ष महेन्द्र प्रसाद यादवको स्वकिय सचिव विनित यादव, भोक्राहा नरसिंह वार्ड नं. ५ का वडा सदस्य अरसद अंसारी, स्वास्थ्य चौकी नरसिंहका स्वास्स्थयकर्मी चन्दन मेहता, ज्योती साह, प्रदिप यादव लगायतको सहभागीता रहेको थियो ।
Discussion about this post