सीमा नाकाहुँदै गाँजा तस्करी

इनरुवा । सुनसरीमा बर्दीधारी प्रहरीहरुले रोकथाम तथा नियन्त्रण गर्न लागिपरेको बताइरँहदा पनि विभिन्न सीमा नाकाहुँदै गाँजा तस्करी अझैँ रोकिएको छैन । पहाडी जिल्लाबाट ल्याइने गाँजा रातिको समयमा जिल्लाका विभिन्न सीमावर्ती क्षेत्रहुँदै भारततर्फ कटाउने गरिएको छ । सशस्त्र प्रहरी र नेपाल प्रहरीको उपस्थिति रहेपनि तस्करहरुले उनीहरूलाई छल्दै गाँजा तस्करी गराउदै आएका छन् ।

माघ २२ गते मध्यरातको समयमा को १ च ९८५२ नम्बरको स्कारपियोबाट सुनसरी प्रहरीले दुईसय ५० केजी गाँजासहित दुईजनालाई नियन्त्रणमा लिएको थियो ।

सुनसरी प्रहरी श्रोतका अनुसार कोशी नदिको फाइदा उठाउदै धनकुटा, भोजपुर,उदयपुरलगायत जिल्लाबाट भारततर्फ गाजा तस्कर हुने गरेको छ । कोशी नदिमा चल्ने डुङ्गा र बाँस कारोबार गर्नेहरूले पहाडी जिल्लाबाट सुनसरी गाँजा भित्र्याउने र सुनसरीहुँदै ती गाँजा भारततर्फ तस्करी गर्ने गरिएको श्रोत बताउँछ । पछिल्लो समय गाजा तस्करी गराउने “ट्रान्जिट पोइन्ट“ कोशी नदि बनेको श्रोतको दाबी छ ।

सुनसरी प्रहरीको चुनौती थपिदै

नेपाल–भारत खुल्ला सीमाका कारण लागूऔषध र गाजा कारोबारले सुनसरी प्रहरीलाई सुरक्षा चुनौती थपिँदै गएको छ । भारतसंगको खुल्ला सीमाको फाईदा उठाएर लागूऔषध र गाजाको कारोबार बढ्दै गएकोले यस्ता कारोबार रोक्न सुनसरी प्रहरीलाई चुनौति थपिएको हो ।

ठूलो परिणाममा लागूऔषध र गाजाको कारोवारी पक्राउ पर्न थालेपछि सुनसरीमा खुल्ला सीमाको फाईदा उठाएर यस्ता कारोवार भईरहेको पाइएको हो ।खासगरी सुनसरीको सीमावर्ती क्षेत्रहरुमा लागूऔषधको कारोवार बढेको पाइन्छ । सुनसरीको सीमावर्ती क्षेत्र लौकही, भण्टावारी,घुस्की कप्तानगंज,लाही,श्रीपुर सहितका नाका प्रयोग गरी दिनहुँ दर्जनौं नेपाली युवाहरु भारतीय बजारहरुमा गएर लागू औषधको सेवन गर्ने र लागूऔषधको कारोबार गर्ने गरेका छन् । सीमावर्ती क्षेत्रका विभिन्न सीमा नाका हुँदा लागू औषधकर्ताको संख्या बढेकोले भारतीय सीमा सुरक्षा बल एसएसबीले समेत चेकजाँचमा थप कडाई गरेको छ ।

नेपाली युवाहरु भारतको भीमनगर ,वीरपूर,फुलकहा लगायतका बजारमा गएर दिनहुँ लागूऔषध सेवन गर्ने र चेकजाँचमा पक्राउ पर्नेहरुलाई एसएसबीले नियन्त्रणमा लिई घण्टौपछि मात्र छाडने गरेका छन् । सुनसरीको सीमावर्ती क्षेत्रहरुमा पछिल्लो समयमा प्रहरीले चेकजाँचमा कडाई गरेपछि भने खुल्ला सीमाको फाईदा उठाएर लागूऔषध र गाँजाको कारोवार गर्ने कारोवारीहरु धमाधम पक्राउ पर्न थालेको छ । जिल्ला प्रहरी कार्यालय सुनसरीको कडा सुरक्षा निगरानीका बीच पनि लागु औषध र गाँजाको कारोवार रोकिएको भने छैन । सुनसरी प्रहरीले दिएको तथ्यांकअनुसार चालु आर्थिक वर्षको हालसम्म जिल्लाको विभिन्न स्थानबाट तीनसय केजीबढी गाजा बरामद भएको छ भने २२ मुद्दामा २७ जना व्यक्ति पक्राउ परेका छन् । जबकि अघिल्लो आर्थिक वर्ष २०७६-०७७ मा चारसय केजी ५४० ग्राम गाजा बरामद भएको थियो भने १५ वटा मुद्दामा २० जना व्यक्ति पक्राउ परेका थिए ।यता सुनसरी प्रहरीका प्रमुख एसपी कमल थापाले लागूऔषध र गाजा कारोवार रोक्नका लागि सक्रिय भएर लागेको बताउँछन् । खुल्ला सीमाको फाईदा उठाएर गैरकानुनी रूपमा लागूऔषध कारोवार गरिएपनि यस्ता कारोबार रोक्न नेपाल प्रहरी लागिपरेको उनको भनाइ छ । लागूऔषध, हातहतियार, चोरीपैठारी, राजस्व छली जस्ता गैरकानुनी कारोबार सुनसरीमा पछिल्लो समयमा उल्लेख्य रुपमा कमि आएको एसपी थापाको दाबी छ ।