सामी परियोजनाको समन्वय बैठक सम्पन्न

इनरुवा । सुनसरीको आप्रावासी श्रोत केन्द्र र जिल्ला प्रशासन कार्यालय सुनसरी बीच समन्वय बैठक समपन्न भएको छ ।
समपन्न बैठकमा सुनसरीका प्रमुख जिल्ला अधिकारी इन्द्रदेव यादवले आफ्ना नागरिकको आधारभुत मानव अधिकारको सम्मान गर्ने, संरक्षण गर्ने र परिपुर्ति गर्ने दायित्व राज्यको भएकाले आफु पछि नपर्ने बताएका छन् ।
प्रजिअ यादवले बैठकमा बोल्दै आफ्ना नागरिक विश्वका जुनसुकै कुनामा भएपनि जिल्ला प्रसाशन कार्यालय सुनसरी नागरिकका पक्षमा जिम्मेवार बन्ने बताए ।

उनले जिल्ला प्रशासन कार्यालय सुनसरीमा पासपोर्ट बनाउन आउने सेवाग्राहीहरुलाई बैदेशिक रोजगार सम्बन्धी सूचनामुलक जानकारी लिनको लागि आप्रावासी श्रोत केन्द्रमा पठाउने र आप्रावासी श्रोत केन्द्रलाई थप व्यवस्थित बनाउनका लागि कोठा नं.समेत उपलब्ध गराउने प्रतिवद्धाता समेत व्यक्त गरेका छन् ।
उता कार्यक्रममा सामुदायीक विकास संस्था सुनसरी द्धारा संचालीत सामी परियोजना सुनसरीका जिल्ला संयोजक धिरज भट्टराईले बैदेशिक रोजगारलाई सुरक्षित र मर्यादित बनाउन आफु कतै नचुकेको बताएका छन् ।
उनले दिनरात आफैँ सुनसरी जिल्लामा सञ्चालीत धरान, इटहरी, इनरुवा र भोक्राहा नरसिंह गाउँपालिका बाहेक स्थानीय तहमा बैदेशिक रोजगारीमा जाने युवाहरुलाई बैदेशिक रोजगार सम्बन्धी विभिन्न सूचनाहरु प्रदान गर्दै आएका छन् ।
पछिल्ला समय गाँउगाँउमा बैदेशिक रोजगारीका लागि यस्तो लहर छ कि, मानिस नजिकैको शहर देखेको हुदैन तर विदेश जानका लागि तयार भएको अवस्था देखिने गरेको जिल्ला संयोजक भट्टराईले जानकारी दिए ।
उनका अनुसार गाउँघर देखी शहर सम्मका अधिकांश युवामा बैदेशिक रोजगारीको एउटा लहर नै देखिन्छ ।
बैदेशिक रोजगारीको क्रममा नेपाली कामदारको मृत्यु हुने कारणहरुको विषयमा समेत सामी परियोजनाका जिल्ला संयोजक भट्टराईले प्रष्ट पारेका छन् ।

उनले बताएअनुासर बैदेशिक रोजगारीमा सडक दुर्घटना, कार्यक्षेत्र दुर्घटना, आत्महत्या, हत्या, तातो मौसम जस्ता कारणहरुले गर्दा नेपाली कामदारहरुको मृत्यु हुने गरेको जानकारी दिए । कतिपय कामदार दिनभर काम गरेपछि एसीमा सुतेपश्चात सुतेको सुतै हुने गरेका छन् । सोचेको जस्तो काम, सेवा सुविधा नपाउने, शोषण, हिंसामा पर्ने जस्ता कारणले विशेषगरी अनौपचारिक क्षेत्रमा कार्यरत नेपाली कामदारहरुको आत्महत्याको दर पनि बढेको बैठकमा प्रस्ट पारे ।
उता सोही बैठकमा सामी परियोजना प्रदेश नं.१ का संयोजक कोपिला दाहालले बैदेशिक रोजगारीका लागि श्रम स्विकृति लिन आवश्यक पर्ने कागजातहरु (पासपोर्ट, भीषा, रोजगार सम्झौता, हवाई टिकट, विमा, स्वास्थ्य परिक्षण प्रमाणपत्र, पैसा बुझाएको रसिद, अभिमुखीकरण तालिम प्रमाणपत्र, सिपको तालिम प्रमाणपत्र) मध्ये अधिकांश कागजात गलत बनाएर बैदेशिक रोजागरमा पठाउने क्रम बढ्दै गएको बताइन् ।

बैदेशिक रोजगारीमा जाने पूरुष सँगै महिलाहरु पनि पीडित हुने गरेको प्रदेश संयोजक दाहालले बताइन् ।
महिला भएका कारण घरदेखी नै हुने शोषण र हिंसाका कारण तुलनात्मक रुपमा पुरुषका तुलनामा महिला कामदारहरु बढी जोखिममा रहेका बताइन् । कतिपय महिला घरमा विभेद, हिंसा, एकल, आर्थिक दायित्व, श्रीमान कमजोर भएका कारण बैदेशिक रोजगारीमा जान्छन् तर त्योभन्दा बढी हिंसा र शोषणको शिकार गन्तब्य देशमा हुनुपरेको अवस्था रहेको बताइन् ।
यता आप्रवासी श्रोत केन्द्र सुनसरीमा बैदेशिक रोजगारी सम्बन्धी विभिन्न किसिमका उजुरी पर्ने गरेको बताएका छन् ।
आप्रवासी श्रोत केन्द्र सुनसरीका परामर्शकर्ता प्रमोद कुमार मेहताका अनुसार चालु आर्थिक वर्षको २०७८÷०७९ को मंसिर मसान्त सम्ममा बैदेशिक रोजगारी सम्बन्धी २ सय ७४ वटा उजुरी परेको बताए सो मध्ये २०४ वटा उजुरी सफल भएको जानकारी दिए ।