इनरूवामा ११ करोडकाे लगानीमा बनेको सुविधासम्पन्न बसपार्क प्रयोगबिहीन

इनरुवा / सुनसरी सदरमुकाम इनरुवामा नयाँ बसपार्क निर्माण भएको तीन वर्ष बितिसकेको छ । २०७५ साल पुस २५ माउद्घाटन भएको वसपार्क अहिलेसम्म सञ्चालनमा आउन सकेको छैन । बसपार्कको उद्घाटन तत्कालीन उपप्रधान एवं स्वास्थ्य तथा जनसङ्ख्या मन्त्री उपेन्द्र यादवले गरेका थिए । उद्घाटन भएको तीन वर्ष पुगिसक्दासमेत बसपार्क सञ्चालनमा सम्बन्धित पक्ष लागिपरेको देखिँदैन । ११ करोड लगानीमा निर्माण भएको बसपार्क लामो समय सञ्चालनमा नआउँदा स्थानीय भने आक्रोसित भएका छन् । उद्घाटन भएको दुई वर्षपछि २०७७ साल माघमा बसपार्क सञ्चालन भयो । तर बसपार्क सञ्चालन भएको ४/५ दिनमा नै विभिन्न कारण देखाउँदै रोकिएको थियो ।              त्यसपछि भने सञ्चालनमा आउन सकेको छैन । बसपार्क सञ्चालनका लागि खासै पहलसमेत नभएको स्थानीयको बुझाइ छ । बसपार्क सञ्चालन हुन नसक्दा अहिले प्रेमिल जोडी, लागुऔषध प्रयोगकर्ता र टिकटक बनाउन आउनेको भिड बढ्न थालेको स्थानीयले बताए । यतिमात्र नभएर लागुऔषध प्रयोगकर्ताको अखडासमेत बन्दै गएको स्थानीय बताउँछन् । बसपार्क निर्माण भएर पनि सञ्चालनमा ल्याउन नसक्दा मुख्य राजमार्ग नै बसपार्कको रूपमा प्रयोग भइरहेको छ । नगरपालिकाले चासो नदेखाएका कारण बसपार्क सञ्चालनमा आउन नसकेको स्थानीय सरिता कार्की ‘घिमिरे’ले बताइन् । करोडौँको लगानीमा निर्माण गरिएको बसपार्क अलपत्र छाड्नु सरोकारवाला निकायको कमजोरी भएको उनको बुझाइ छ । जुन उद्देश्यका साथ बसपार्क निर्माण भएको हो, त्यहीअनुसार छिटो सञ्चालनमा ल्याउनुपर्ने उनले बताइन् । निर्माणका लागि निःशुल्क जग्गा उपलब्ध गराएका स्थानीय रमेश श्रेष्ठ पनि आक्रोशित भएका छन् । बसपार्क निर्माणका लागि पाँच कठ्ठा जग्गा उपलब्ध गराएका उनले सञ्चालनमा ढिलाइ भएका कारण जग्गा उपलब्ध गराउने सबैसँग छलफल गरेर जग्गा फिर्ता माग्नुपर्ने अवस्था आएको बताए । नगरपालिकाले बसपार्क सञ्चालनमा कुनै चासो नदेखाएको उनको भनाइ छ । निर्माण सम्पन्न भएको लामो समयसम्म बसपार्क सञ्चालनमा ल्याउन नसक्दा इनरुवा नगरपालिका आलोचित बन्न थालेको छ । नगरपालिका भने यातायात व्यवसायीको अवरोधका कारण बसपार्क सञ्चालनमा समस्या भएको बताउँछ । नगरपालिकाका तर्फबाट बसपार्क सञ्चालनका लागि पहल, प्रयन्त भइरहेको बताउँदै प्रमुख प्रशासकीय अधिकृत डिल्लिराज निरौलाले भने, ‘पहिला पनि दुईचार दिन बसपार्क सञ्चालनमा आयो । तर यातायात व्यवसायीहरू जान नमानेका कारण सञ्चालन हुन नसकेको हो, बसपार्क सञ्चालनका लागि हामी पुसभित्रमा छलफल गर्ने छौँ ।’ बसपार्क सञ्चालनमा नआउनुमा नगरपालिकाको कुनै कमजोरी नभएको उनले बताए । ‘अहिले नै सञ्चालनमा आउँछ भनेर भन्न सक्ने अवस्था छैन,’ निरौला भन्छन्, ‘तर छिट्टै यातायात व्यवसायी र सम्बन्धित पक्षलाई बोलाएर छलफलको माध्यमबाट निष्कर्ष निकाल्छौँ, र चाँडै सञ्चालन गर्नेछौँ ।’