सुशासन सम्बन्धी अन्तरकृया कार्यक्रम सम्पन्न

इनरुवा । सुनसरीको भोक्राहा नरसिंह गाउँपालिकामा स्थानीय जनप्रतिनिधि र सरोकारबालाहरुसंगको सुशासन सम्बन्धी अन्तरकृया कार्यक्रम सम्पन्न भएको छ ।
गाउँपालिकामा आयोजित एक कार्यक्रममा सुशासन र जवाफदेहिता वर्तमान समयको अपरिहार्य आवश्यकता रहेको सरोकारवालाले बताएका छन ।
भ्रष्टाचार बिरूद्धको अभियानमा लागेको नेसनल टाईगर्स नेपाल सहित विभिन्न संस्थाहरुको आयोजनामा सोमबार स्थानीय जनप्रतिनिधि र सरोकारबालाहरुसंगको सुशासन सम्बन्धी अन्तरकृया सम्पन्न भएको हो ।
सो कार्यक्रममा वत्ताहरुले सुशासनको पक्षलाई आत्मसाथ नगरिदा गाउँदेखी मुलुकको केन्द्रमा समेत अस्वाभाबिक खालका बिकृतिहरु देखिने गरेको बताएका छन ।
कार्यक्रममा भोक्राहा नरसिंह गाउँपालिका वडा नं. ८ का वडा सदस्य तथा न्यायिक समिति सदस्य इर्फान अलिले सार्वजनिक, नीजि क्षेत्रमा सुशासनको अपरिहार्य आवश्यकता रहेको बताए ।
उनले न्याँयपालिका, कार्यापालिका र व्यवस्थापीका सहित नागरिक समाज लगायतका क्षेत्रमा पनि सुशासन अपहिरार्य आवश्यकता रहेको बताए ।

अलिले वडादेखी गाउँसम्म र जिल्लादेखी केन्द्रसम्म सुशासन कायम गर्नका लागि जवाफदेहिताको अभिबृद्धि गर्नुपर्नेमा जोड दिए ।
मानव अधिकार संजालका सुनसरी संयोजक रमेश भट्टराईले युवा तथा नागरिक समाजको भूमिका पहरेदारी र खबरदारीको रुपमा हुनुपर्ने बताए ।
पत्रकार जयकृष्ण यादवले सुशासनको संस्थागत विकासका लागि सरकारले सुशासन ऐन तथा नियमावली निर्माण गरिएकाले त्यसको कार्यान्वयनमा जोड दिनुपर्ने बताए । यादवले सेवा सहित देशको ऐन कानुनको परिधी भित्र रहेर सार्वजनिक निकायलाई पारदर्शी र जिम्मेवार बन्न आग्रह गरे ।
कार्यक्रममा मानव अधिकार समूहका सचिव बेलाल अंसारीले सबै ठाउँमा सूचना अधिकारीहरुको व्यवस्था भएपनि नागरिकले सूचना नपाएको गुनासो गरे । अंसारीले सूचना अधिकारीहरुलाई सूचना नभएको गुनासो समेत आएकाले सुशासनको कल्पना गर्ने निकै टाढाको कुरा भएको बताए । कार्यक्रममा सेराज हुसेनले सुशासन कायम गर्नका लागि नीतिसगैं नैतिकता पनि ठीक हुनुपर्नेमा जोड दिए ।
कार्यक्रममा अधिकारकर्मी आफिया बानोले सुशासन प्रर्बद्धनमा नागरिक समाजको भूमिका बढाउनुपर्नेमा जोड दिए ।
सहभागी मानव अधिकार समूहकी नमिता मण्डलले प्रत्येक महिना , प्रत्येक वडामा सेवा प्रदायक तथा अधिकारवालाहरुसंग सुशासन तथा सदाचार कायम गर्नको लागि अन्तरकृया गर्नुपर्नेमा जोड दिए । कार्यक्रम सामाजिक परिवर्तन केन्द्रको सहयोगमा सम्पन्न भएको थियो ।