बर्जु गाउँपालिकामा भएको घटना छानविनका लागि समिति गठन

सन्तोष मेहता । सुनसरी जिल्लाको बर्जु गाउँपालिकामा भएको घटना छानविनका लागि प्रशासनले छानबिन समिति गठन गरेको छ । सुनसरी प्रशासनले घटना छानविनका लागि सहायक प्रमुख जिल्ला अधिकारीको संयोजकत्वमा ५ सदस्यीय समिति गठन गरेको छ ।                          सहायक प्रमुख जिल्ला अधिकारी आनन्द पौडेल संयोजक रहेको समितिमा जिल्ला प्रहरी कार्यालय सुनसरीका डिएसपी नरेन्द्रकुमार कार्की, सशस्त्र प्रहरी बल ४ नम्बर गणका डिएसपी मित्रलाल श्रेष्ठ सदस्य रहेकाे  छ। त्यसैगरी राष्ट्रिय अनुसन्धान जिल्ला कार्यालयका अनुसन्धान अधिकृत किरण भट्टराई र बर्जु गाउँपालिकाका प्रमुख प्रशासकीय अधिकृत प्रमोद चौधरीसमेत छानविन समितिको सदस्यमा रहेको भएको छ । सुनसरीका प्रमुख जिल्ला अधिकारी इन्द्रदेव यादवले गठित समितिलाई महोत्सवको क्रममा भएको आगजनी र तोडफोड सम्वन्धमा अध्ययन तथा अनुसन्धान गरी ५ दिनभित्र प्रतिवेदन बुझाउन भनिएको बताए । यसैबिच सुनसरी प्रशासनले घटना सम्वन्धमा पत्रकार सम्मेलन समेतको आयोजना गरी आफ्नो धारणा सार्वजनिक गरेको छ । सो क्रममा प्रशासनले महोत्सवमा भएको घटनामा बर्जु गाउँपालिको कार्यालय पूर्ण दोषी रहेको बताएको छ । महोत्सव आयोजकका रुपमा रहेको गाउँपालिकाले प्रशासनको निर्देशन अटेर गर्दा दुर्घटना भएको प्रशासनको ठहर छ । प्रजिअ यादवले महोत्सव रोक्न गरिएको आफूहरुको पटक–पटकको प्रयासलाई गाउँपालिकाले बेवास्ता गरी मनोमानी गर्दा दुर्घटना निम्तिएको बताए । उनले मानवीय क्षति रोक्न भीडमाथि बल प्रयोग गर्न नसकिएको जिकिर गरे । यादवले प्रहरी प्रशासनले संयमता अपनाउँदा मानवीय क्षति भने हुन नपाएको बताए । महोत्सवमा बोलाइएका भोजपुरी कलाकार नआएपछि आक्रोसित भीड तोडफोड र आगजनीमा उत्रिएको थियो । सो क्रममा चार वटा भारतीय नम्बर प्लेटको स्कारपियो, एक थान मोटरसाइकलमा आगजनी भएको थियो ।