खेसारीलाल यादव कसरी भारतबाट नेपाल छिरे भन्ने नयाँ बहस सुरू

इनरुवा । बर्जु महोत्सव घटनाका सन्दर्भमा विभिन्न कोणबाट टिकाटिप्पणी भैरहँदा खेसारीलाल इन्ट्रि पोइन्टको विषय उपरसमेत बहस छेडिएको छ ।
महोत्सवमा प्रस्तुतिका लागि बोलाइएका भोजपुरी कलाकार विराटनगर आइपुग्दा भारतबाट कहाँ र कुन नाका हुँदै नेपाल छिरे भन्ने विषयले नयाँ बहस छेडेको हो ।
सो विषयमा सुनसरीतर्फको प्रहरी प्रशासन अनभिज्ञ देखिएको छ । प्रजिअ इन्द्रदेव यादवका साथै प्रहरी प्रमुख सञ्जयसिंह थापा स्वयम्ले समेत सो बारेमा बुझ्ने काम भैरहेको जवाफ दिएका छन् ।
महोत्सव घटनाको विषयलाई लिएर एक अर्कोमा दोषारोपण भैरहँदा कार्यक्रमस्थल बर्जु पुग्नुपूर्व विराटनगरको एसियाटिक होटल पुगेका खेसारीलाल यादव कसरी नेपाल छिरे । कुन नाका र बाटो भएर प्रवेश गरे भन्ने बारेमा खुल्न सकेको देखिँदैन । जसले बर्जु घटनामा नयाँ ‘ट्विस्ट’ थपेको छ ।
तोडफोड र आगजनीको घटनामा आयोजक बर्जु सामुदायिक विकास संस्था, गाउँपालिकाको कार्यालय र सुनसरी प्रशासनबीच दोषारोपणको विषयमा दोहोरी चलिरहँदा बाहिरिएको सो प्रसङ्गले घटनालाई थप पेचिलो बनाउँदै लगेको अधिकांशको बुझाइ छ ।
यता खेसारीलालको नेपाल प्रवेशको विषयमा प्रशासनका साथै जिल्लास्थित सुरक्षा निकायले समेत आफूहरूसँग कुनै जानकारी नभएको जनाएको छ । खेसारीलालको प्रवेशको विषय यकिन भैनसकेको बताएका प्रजिअ इन्द्रदेव यादवले मोरङ प्रशासनसमेत सो बारे अनभिज्ञ पाइएको बताए । उनले त्यसतर्फ अध्ययन तथा छानबिन भने भैरहेको जानकारी दिए ।
प्रजिअ यादवले घटनाका सम्बन्धमा छानबिनका लागि सहायक प्रजिअ आनन्द पौडेल संयोजक रहेको पाँच सदस्यीय समिति गठन गरिएकाले विस्तृत जानकारी प्रतिवेदनले बोल्ने बताए ।
यता स्रोतले भने बर्जु महोत्सवका लागि आएका भारत विहारका भोजपुरी कलाकार खेसारीलाल यादव सुनसरीको साहेवगञ्ज नाका भएर नेपाल प्रवेश गरेको हुनसक्ने सम्भावना उपर छानबिन भैरहेको बताउँछ । स्रोतले सो सम्बन्धमा प्रहरी प्रशासनले अनुसन्धान अघि बढाएको बताएको छ ।
स्रोतका अनुसार नेपाल प्रवेश गरेका भारतीय कलाकार यादवको कहीँ कतै ‘इन्ट्रि–रेकर्ड’ भने भेटिएको छैन । जसलाई सुरक्षा कमजोरीका रूपमा लिएर प्रशासनले अनुसन्धान अघि बढाएको उसको भनाइ छ ।
घटनापश्चात् खेसारीलाललाई भेट्न प्रदेश १ का सामाजिक विकास मन्त्री जयराम यादव स्वयम् होटल पुगेका थिए । उनकै उपस्थितिमा खेसारीलालले जारी गरेको भिडियोमा बर्जु घटनामा आयोजकको दोष रहेको भन्दै डेढ करोड बराबरको क्षतिपूर्तिको माग दाबी गरिएको छ ।

कार्यक्रमका लागि नेपाल आई घटनापश्चात् फर्किएका यादव कहाँ र कुन नाका भएर नेपाल प्रवेश गरेका थिए भन्ने खुल्न नसक्नु आफैमा आश्चर्यजनक मानिएको छ । कोरोना प्रोटोकलका बीच भारतीय कलाकार टिमसहित नेपाल आएर फर्किंदासमेत त्यसबारे जानकारी नहुनुलाई सुरक्षा चुकका रूपका व्याख्या गर्न थालिएको छ ।
महोत्सवमा भएको घटनाको सम्बन्धमा सुनसरी प्रशासनले कार्यक्रम रद्द गराउन गरेको परिपत्रलाई आयोजक र स्वयम् गाउँपालिकाले अटेर गरेको बताउँदै आएको छ ।
प्रशासनले आगजनी र तोडफोड घटनाको सारा दोषी गाउँपालिका प्रमुख रघुनन्दन चौधरी रहेको बताइरहँदा गाउँपालिका अध्यक्षले भने विज्ञप्तिमार्फत् पूर्ण दोषी आयोजक रहेको भन्दै आफूमाथि लगाइएको आरोपको खण्डन गरेका छन् । चौधरीले मिडियाले आफूमाथि दोष थोपरेको पनि बताएका छन् । उता आयोजकले भने खेसारीलाल कार्यक्रममा नआएको भन्दै उनीमाथि आक्रोस पोखेको छ ।
खेसारीलालको इन्ट्रि पोइन्टको विषयसँगै प्रशासनले महोत्सवको इजाजत रद्दको परिपत्र कार्यान्वयन नभएपश्चात्को अवस्थामा प्रहरी प्रशासनले लगत्तै किन कार्यक्रम बन्द गराएन भन्ने विषयसमेत स्थानीयस्तरमा बहसको विषय बनेको छ ।ब्लाष्टखबर