शिक्षक संघ सुनसरीका अध्यक्ष र सरकारी शिक्षक रहेकी उनकै श्रीमतीकाे लगानीमा प्राइभेट स्कुल  स‌चालनमा

इनरुवा । नेपाल शिक्षक संघ सुनसरीका अध्यक्ष एवम भगवती माध्यमिक विद्यालय इनरुवामा कार्यरत मावी शिक्षक बेणु सिग्देल र सामुदायिक विद्यालयमै कार्यरत उनकी श्रीमतीले निजी विद्यालय सञ्चालन गरिरहेको पाइएको छ ।
संघका अध्यक्ष सिग्देलले श्रीमती शोभा सिग्देलको नामबाट इनरुवामा उच्च माध्यमिक तहसम्मको कक्षा सञ्चालन भईरहेको सूर्यकिरण एकेडमीमा लगानी गराएको पाइएको हो ।
सरकारी शिक्षकहरुले कुनैपनि क्षेत्रमा लगानी गर्नु पूर्व विभागीय अनुमति लिनु पर्ने कानूनी ब्यवस्था रहेको छ । सामुदायिक विद्यालयका शिक्षकहरुले बार्षिक रुपमा आफ्नो सम्पत्ति विवरणसमेत बुझाउनु पर्ने हुन्छ । तर सिग्देलले निजी विद्यालयमा लगानीका लागि विभागीय अनुमति नलिएको र आफ्नो सम्पत्ति विवरणमा पनि सो लगानी नदेखाउने गरेको इनरुवा नगरपालिका र शिक्षा विकास तथा समन्वय ईकाइ स्रोतले जनाएको छ ।
शिक्षा इकाई स्रोतले भन्यो, ‘एक त विभागीय स्विकृती नलिई सरकारी शिक्षकहरुले अन्य क्षेत्रमा लगानी गर्न, ब्यापार ब्यवसाय गर्न पाउँदैनन त्यसमा पनि सरकारी विद्यालयको शिक्षकले निजी विद्यालयमा लगानी गर्न त झनै पाउँदैनन । यो त नैतिक रुपमा पनि संकट पर्ने विषय हो ।’
सुर्यकिरण एकेडेमीको लगानीकर्ता शेयर संचालकमा मनोज यादव, इन्द्रविनोद भट्टराई र सिग्देल परिवारका तर्फबाट प्रावि तहकी शिक्षक शोभा सिग्देल रहेकी छिन ।
सुर्यकिरण एकेडेमीका सञ्चालक तथा प्रिन्सिपल मनोज यादवले शिक्षक शोभा सिग्देलका नाममा ३३ प्रतिशत शेयर लगानी रहेको जनाएका छन ।
सो निजी विद्यालय पहिला सिग्देल परिवारले किनेर पछि त्यसमा दुई जना लगानी कर्तालाई थपेको उनी निकटहरु बताउँछन ।
आफ्नो लगानी रहेको निजी विद्यालयको निरन्तर संरक्षण गरिरहेका सिग्देलले शिक्षा इकाईलाई प्रभावमा पारेर एसईईको सेन्टरसमेत आफू अनुकुल हुने गरी तय गराउने गरेका छन ।
शिक्षकका अगुवा नेताको शेयर लगानी रहेको प्राइभेट स्कुलको २०८० सालमा हुने एसईइ परिक्षाको केन्द्र आफु कार्यरत रहेको सामुदायिक विद्यालयमा पारेका छन
भगवती माध्यामिक विद्यालय इनरुवामा कार्यरत रहेका शिक्षक वेणु सिग्देल र सरस्वती आधारभुत विद्यालय रामधुनीमा कार्यरत शिक्षक शोभा सिग्देलको लगानी रहेको सुर्यकिरण एकेडेमीको परिक्षा केन्द्र भगवती मावि इनरुवामा तोकिएको हो । दुई कार्यकाल शिक्षक संघको जिल्ला अध्यक्ष भईसकेका सिग्देल भगवती मावीका भावी प्रधानाध्यापक बन्ने लगभग निश्चित छ ।
शिक्षक संघ सुनसरीका अध्यक्ष बेणु सिग्देलले सुर्यकिरण एकेडेमीमा हालै सामुदायिक विद्यालयको शिक्षक पदमा कार्यरत रहेकी श्रीमती शोभा सिग्देल शिक्षण सेवा प्रवेश गर्नु अगाडिनै शेयर लगानीकर्ताका रुपमा रहेको बताए ।
सिग्देलले हाल सामुदायिक विद्यालयको शिक्षकका रुपमा रहेपनि आफुहरुको शेयर बाहेक अन्य सलग्नता सुर्यकिरण एकेडेमीमा नरहेकाले परिक्षा केन्द्र तोक्ने बिषयमा कुनै दवाव नदिएको दावी गरेका छन ।
उनले भने, ‘धेरै अगाडिदेखि सुर्यकिरण एकेडेमीको परिक्षा केन्द्र आफु कार्यरत रहेको विद्यालयमा रहेकाले यसपटक पनि आफुले भगवती माध्यामिक विद्यालयमा परिक्षा केन्द्र तोक्न कुनै चासो देखाएको छैन ।’
निजी विद्यालय संचालकहरुका अनुसार नेपाल शिक्षक संघका अध्यक्षसमेत रहेका सिग्देलले शिक्षा विकास तथा समन्वय ईकाइ सुनसरीका प्रमुख खगेन्द्र सुवेदीलाई प्रभावमा पारि आफ्नो लगानीको प्राइभेट स्कुलका साथै जिल्लाका विभिन्न पालिकाका प्राइभेट स्कुलको परिक्षा केन्द्र अनुकुल हुने विद्यालयमा कायम गर्न लगाएका छन ।
निजी विद्यालय संचालकले सिग्देलमार्फत शिक्षा विकास तथा समन्वय ईकाइ सुनसरीका प्रमुख खगेन्द्र सुवेदीलाई नजराना बुझाउने विद्यालयको परिक्षा केन्द्र रोजाईमा परेको स्थानमा भएको आरोप लगाएका छन ।
सामुदायिक विद्यालयमा कार्यरत शिक्षकले विद्यालय व्यवस्थापन समिति र स्थानीय तहको स्वीकृति नलिई आफु कार्यरत रहेको विद्यालय बाहिर कुनैपनि शैक्षिक गतिविधिमा भाग लिन नपाउने कानुनी व्यवस्था रहेको छ ।
सुनसरीका सरकारी सामुदायिक विद्यालयका सयभन्दा बढी शिक्षकहरूले निजी स्कूल सञ्चालन गरेको र कतिपयले दुईतिर पूर्णकालीन शिक्षकका रूपमा काम गरेको पाइएको छ ।
विभिन्न राजनीतिक दलको भातृ संस्थाका रुपमा रहेका शिक्षकका युनियनमा नेतृत्व गरिरहेका अगुवाहरु सामुदायिक विद्यालयमा नियुक्त भएर निजी विद्यालय संचालनमा सक्रिय रहेको पाइन्छ ।
सरकारी कोषबाट तलब–भत्ताको सुविधा लिएका शिक्षकले आफूले नियुक्ति पाएको विद्यालय बाहेक अन्यत्र कुनै काम गर्न नपाउने कानुनी व्यवस्था विपरित निजी विद्यालय नै संचालन गरेको पाइएको छ ।