गोली हानेर मारिएको बँदेल बेवारिसे देखाएर पूर्वडीआईजी र बहालवाला सईलाई उन्मुक्ति

राजविराज – सप्तरीको हनुमाननगर कंकालिनी नगरपालिका–१, कोसी पलार क्षेत्रमा बुधबार राति एक समूहले गोली हानेर मारेको बँदेलसहित नेपाल प्रहरीका पूर्वडीआईजी ज्ञानविक्रम शाहसहित १० जना शिकारी पक्राउ परेका छन्।

पक्राउ पर्नेहरूमा पूर्वउपसभामुख गंगाप्रसाद यादवका छोरा आकाश बहडखेर यादव र नेपाल प्रहरीका बहालवाला सई (प्रहरी नायब निरिक्षक) सञ्जय न्यौपाने समेत छन्।

शिकारी समूहलाई पक्राउ गर्ने ईलाका प्रहरी कार्यालय कञ्चनपुरका इन्स्पेक्टर सुशान्त मिश्रको नेतृत्वमा रहेको टोलीले गाँजा तस्करको खोजीमा पुगेका बेला हतियारसहितको शिकारी टोली फेला पारेपछि नियन्त्रणमा लिएको थियो।

शिकारी टोलीमा उच्च पदस्थ व्यक्तिहरूको संलग्नता रहेको जानकारी पाएपछि प्रहरीको पहिलो योजना उनीहरूलाई चुपचाप छोड्ने थियो। तर, स्थानीयवासीले घटनाको जानकारी पाएपछि प्रहरीको यो योजना असफल भएको थियो।

तर, सप्तरी प्रहरीले अहिले सबै अभियुक्तहरूलाई जिम्मा जमानीमा छोडिसकेको छ। मारेको बँदेल र २ त ६९ नम्बरको ट्याक्टरलाई बेवारिसे देखाएर विहिबार साँझ सव डिभिजन वन कार्यालय कन्चनपुरको जिम्मा लगाइएको छ। शिकारी टोली चढेको स्कारपियो र हतियार भने जिल्ला प्रहरी कार्यालयमा राखिएको छ।

पूर्वडीआईजी शाहले सुनसरीको इटहरीमा फनपार्क रिसोर्ट सञ्चालन गरेका छन्। स्थानीयहरूका अनुसार, उनी लामो समयदेखि सप्तरीमा आएर शिकार खेल्ने गर्दथे। कोशी टप्पु वन्यजन्तु आरक्षको क्षेत्रमा समेत पसेर उनीहरूको टोलीले बँदेल, दुम्सी, खरायो, हरिणलगायतका वन्यजन्तु मारेर लगेको बताइएको छ।

यस विषयमा स्थानीयवासीले सप्तरी प्रहरीलाई पटक–पटक जानकारी गराए पनि प्रहरीले कुनै कदम नचालेको थियो। तर, यस पटक शाहलाई अन्जानमै पक्राउ गर्नुपर्ने स्थिति आएको थियो।

प्रहरीले बरामद गरेको २२ क्यालिबरको राइफल शाहकै नाममा रहेको जनाएको छ। शाहले लाइसन्सको फोटोकपी उपलब्ध गराए पनि, प्रहरीले यो फोटोकपी सार्वजनिक गर्ने हिम्मत गरेको छैन। हतियारको लाइसन्स कुन क्षेत्रका लागि र कुन प्रयोजनका लागि दिइएको थियो भन्ने विषयमा पनि प्रहरीले खुलासा गरेको छैन।

सई सञ्जय न्यौपानेको विगत पनि विवादास्पद रहेको छ। उनी तीन वर्षअघि सप्तरीमै कार्यरत रहँदा राजमार्गका होटलहरूमा आतंक मच्चाएको आरोप छ। होटलमा गएर खानपिन गरेपछि ‘म घुमुवा प्रहरी हुँ’ भन्दै पैसा उठाउने र ‘वेस्यावृत्ति गरेको सूचना आएको छ’ भन्दै धम्क्याएर पैसा असुल्ने गरेको आरोप स्थानीय होटल सञ्चालकहरूले लगाएका थिए।

सन् २०७८ मा, कञ्चनरुप नगरपालिकाको एक होटलमा पर्यटकहरूमाथि गरेको दुर्व्यवहारको आरोपमा पनि न्यौपाने विवादमा मुछिएका थिए। यी सबै प्रकरण बाहिर आएपछि सप्तरी प्रहरीका तत्कालीन डीएसपी माधव प्रसाद काफ्लेले अनुसन्धान गर्ने प्रतिबद्धता जनाए पनि, अन्ततः कुनै ठोस कारबाही भएको छैन।

यता घटनाले उच्च पदस्थ व्यक्तिहरूले कानुनी कारबाहीबाट कसरी उम्किन्छन् भन्ने उदाहरण प्रस्तुत गरेको छ। स्थानीयवासी र सरोकारवाला निकायहरूले घटनाको निष्पक्ष छानबिन गरी दोषीलाई कारबाही गर्नुपर्ने माग गरेका छन्।