सुनसरी – जिल्ला प्रहरी कार्यालय सुनसरी र सनातन कुटुम्ब नेपाल इनरुवा सुनसरीको सहकार्यमा सवारी चालक सचेतना अभिवृद्धि कार्यक्रम मिति २०८१ माघ १५ गते सफलतापूर्वक सम्पन्न गरिएको छ। इनरुवा नगरपालिका–१ स्थित बसचोकमा आयोजित उक्त कार्यक्रममा सवारी चालक, यातायात व्यवसायी, विद्यार्थी, समाजसेवी, पत्रकारलगायतको व्यापक सहभागिता रहेको थियो।
कार्यक्रमको उद्घाटन जिल्ला प्रहरी कार्यालय सुनसरीका प्रहरी नायव उपरीक्षक राम प्रसाद तिमल्सिनाको प्रमुख आतिथ्यमा सम्पन्न भएको थियो। कार्यक्रममा “बाचौँ र बचाँउ, जिम्मेवार चालक बनौँ” भन्ने मुल नारालाई आत्मसात गर्दै सवारी सुरक्षाका विभिन्न पक्षमा छलफल गरिएकाे थियो ।
कार्यक्रमका क्रममा पूर्व–पश्चिम राजमार्गमा गुड्ने सवारी साधनहरूमा सचेतनामूलक स्टिकर टाँस्ने तथा पर्चा वितरण गर्ने काम गरिएको थियो। बिहान ८ बजेदेखि सुरू भएको यो कार्यक्रम १० बजेसम्म सञ्चालन भएको थियो।
प्रमुख अतिथि तिमल्सिनाले आफ्नो सम्बोधनमा सवारी सुरक्षाको महत्त्व र जिम्मेवार चालक बन्नु पर्ने आवश्यकतामा जोड दिँदै सबैलाई नियम पालना गर्न आग्रह गरे। यसैगरी, सनातन कुटुम्ब नेपालका पदाधिकारीहरूले पनि सुरक्षित यातायातका लागि जनचेतनाको आवश्यकता औंल्याउँदै यस्ता कार्यक्रमहरूलाई निरन्तरता दिनुपर्ने बताए।
कार्यक्रममा सहभागी चालकहरूले यस प्रकारका सचेतनामूलक कार्यक्रमले आफूहरूलाई जिम्मेवार र सचेत बनाउने बताए।
कार्यक्रम सफलतापूर्वक सम्पन्न गर्न सहयोग गर्ने सबैलाई धन्यवाद दिँदै आयोजक पक्षले आगामी दिनमा पनि यस्तै कार्यक्रम गर्ने प्रतिबद्धता जनाएको छ।










Discussion about this post