इनरुवा । कोशी प्रदेशमा लागुऔषध सेवन गरेर सवारी साधन चलाउने घटनामा वृद्धि हुँदै गएको छ। केही दिनअघि झापामा १४ जना चालक तथा सहचालकमाथि मुद्दा दायर गरिएपछि सुनसरीबाट पनि १४ जना लागुऔषध प्रयोगकर्ता सवारी चालक तथा सहचालक पक्राउ परेका छन्।
सुनसरी जिल्ला प्रहरी कार्यालय र राजमार्ग सुरक्षा तथा ट्राफिक व्यवस्थापन कार्यालय इटहरीको टोलीले कोशी राजमार्गमा सवारी चेकजाँच गर्ने क्रममा उनीहरूलाई पक्राउ गरेको हो। सुनसरी प्रहरीका प्रवक्ता डीएसपी रामप्रसाद तिमल्सिनाका अनुसार विशेष सूचनाको आधारमा इटहरी–धरान सडकखण्डमा चेकजाँच गरिँदा लागुऔषध सेवन गरेर सवारी चलाउने १४ जना पक्राउ परेका हुन्।
पक्राउ परेका चालकहरूको विवरण
मोरङ: बेलबारी-२ का २६ वर्षीय उज्वल श्रेष्ठ, कानेपोखरी-४ का ४६ वर्षीय श्याम चौधरी, उर्लाबारी-६ का २२ वर्षीय भुवन न्यौपाने।
उदयपुर: त्रियुगा नगरपालिका-३ का २८ वर्षीय किरण थापा, वडा नं. ५ का २२ वर्षीय राहुल राई।
झापा: गौरदह-४ का ३९ वर्षीय हरिबहादुर ठकुरी, कन्काई-१ का ३५ वर्षीय रूपलाल ऋषिदेव, मेचीनगर-१२ का १९ वर्षीय सुमन बिक।
सुनसरी: धरान-८ का २१ वर्षीय अमिन राई, इटहरी-१३ का २० वर्षीय समिर मगर, वडा नं. २० का ४१ वर्षीय कृष्ण सुबेदी, वडा नं. १२ का २८ वर्षीय सुबोध चौधरी, वडा नं. २ का ४१ वर्षीय दिपक घले गुरुङ।
तेह्रथुम: लालीगुराँस-३ का २५ वर्षीय निश्चल कार्की।
पक्राउ परेकाहरूलाई सुनसरी प्रहरीको हिरासतमा राखेर थप अनुसन्धान भइरहेको डीएसपी तिमल्सिनाले जानकारी दिए।
झापामा पनि लागुऔषध सेवन गरेर सवारी चलाउने १४ जना पक्राउ
झापाको कमल गाउँपालिका, केर्खामा गत शुक्रवार लागुऔषध सेवन परीक्षण कार्यक्रम राखिएको थियो। परीक्षणको क्रममा सार्वजनिक सवारी साधन चलाउँदै गरेका १४ जनामा लागुऔषध सेवन गरेको पुष्टि भएपछि उनीहरूलाई पक्राउ गरी इलाका प्रहरी कार्यालय दमकमा मुद्दा दायर गरिएको डीएसपी निशान थापाले बताए।
सवारी सुरक्षाका लागि प्रहरीको अभियान
लागुऔषध सेवन गरेर सवारी चलाउँदा दुर्घटनाको जोखिम उच्च हुने भएकाले प्रहरीको सक्रियता बढाइएको छ। यात्रुको ज्यान जोखिममा पर्ने घटनालाई रोक्न कोशी प्रदेशका विभिन्न क्षेत्रमा ट्राफिक प्रहरी र स्वास्थ्यकर्मीको सहयोगमा चेकजाँचलाई तीव्र बनाइएको डीएसपी तिमल्सिनाले जनाएका छन्।
प्रहरीले यात्रुहरूको सुरक्षाका लागि यस्ता अभियन्तालाई थप कडाइका साथ कानुनी कारबाही गर्ने चेतावनी दिएको छ।
Discussion about this post