इनरुवा । अवैध लागुऔषध नियन्त्रणका नाममा प्रहरीलाई दिइने गोप्य सूचनामै षड्यन्त्र मिसिएको रहस्य मोरङमा खुलासा भएको छ। एकपछि अर्को गर्दै उस्तै प्रकृतिका सूचनाले प्रहरीलाई अल्मल्याउने मात्र होइन, व्यक्तिगत रिसइबी साँध्न निर्दोषलाई फसाउने प्रयास भएको अनुसन्धानबाट खुलेको हो।
गत मंसिर २७ गते प्रदेश–१–०४–००२ प ६४७१ नम्बरको मोटरसाइकलमा ब्राउनसुगर बोकेको सूचना प्रहरीसम्म पुग्यो। सूचनाका आधारमा गरिएको चेकजाँचमा मोटरसाइकलको दायाँपट्टीको इन्डिकेटरभित्र खैरो हिरोइन जस्तो देखिने १३.३१० ग्राम पदार्थ भेटियो। सवारी चालक मोरङ धनपालथान–२ का २९ वर्षीय राजीव चौधरी पक्राउ परे। तर, उनले भेटिएको पदार्थ आफ्नो नभएको दाबी गर्दै आए।
यस घटनाले प्रहरीलाई अघिल्लो एक प्रकरण सम्झायो। गत बैशाख २० गते पनि धनपालथान–२ कै ४५ वर्षीय चन्द्रशेखर मण्डल उस्तै सूचनाका आधारमा पक्राउ परेका थिए। उनको मोटरसाइकलको इन्डिकेटरमै ब्राउनसुगर राखिएको भनिएको थियो। तर, परीक्षण गर्दा बरामद गरिएको पदार्थ लागुऔषध नभएको पुष्टि भएपछि उनी छुटेका थिए।
दुवै घटनाको समानताले प्रहरीको शंका गहिरियो। अनुसन्धान गर्दै जाँदा चौधरी र मण्डल ज्वाँई–ससुरा रहेको खुलेपछि प्रहरी निष्कर्षमा पुग्यो—सूचना संयोग होइन, योजनाबद्ध षड्यन्त्र थियो।
अनुसन्धानले धनपालथान–७ का २२ वर्षीय विशालकुमार सिंहलाई योजनाको मुख्य सूत्रधारका रूपमा देखायो। सिंहको चन्द्रशेखर मण्डलसँग व्यक्तिगत रिसइबी रहेकाले उनले पहिला ससुरालाई र पछि ज्वाँईलाई फसाउने योजना बनाएको खुलेको हो।
मोरङ प्रहरीका प्रवक्ता कोपिला चुँडालका अनुसार सिंहले विराटनगर–९ घोघापुलका राजा धोवी, धनपालथान–७ का २७ वर्षीय रोशन मण्डल र धनपालथान–१ का २८ वर्षीय पारस मण्डलसँग मिलेर यस्तो षड्यन्त्र रचेका थिए। उनीहरुले ब्राउनसुगर भन्दै कुनै लिसाइलो वस्तु मोटरसाइकलको इन्डिकेटरमा राखी प्रहरीलाई झुटो सूचना दिएका थिए।
थप अनुसन्धानमा अझ चकित पार्ने तथ्य खुल्यो। प्रहरीलाई सूचना दिने यी व्यक्ति स्वयं लागुऔषध कारोबारमा संलग्न रहेको पाइएको छ। आफ्ना गतिविधि ढाकछोप गर्न र प्रहरीको ध्यान अन्यत्र मोड्न झुटा सूचना दिने रणनीति उनीहरुले अपनाएको प्रहरीको निष्कर्ष छ।
प्रहरीका अनुसार, यो घटना केवल झुटो सूचनाको विषय मात्र होइन, व्यक्तिगत बदला र अपराध लुकाउने दोहोरो खेलको उदाहरण बनेको छ।
Discussion about this post