बाबा पेपर मिलदेखि झुलेङ्गे पुलसम्म कालोपत्रे जीवनशैली नै सहज बन्दै

दिपेन्द्र यादव /सुनसरी – कहिले काँक्रीटको सपना देख्ने गाउँहरू आजकल कालोपत्रेको स्पर्श पाउँदैछन्। भोक्राहा नरसिंह गाउँपालिका–५ का बासिन्दाका लागि यस्तै एउटा सपना साकार भएको छ। बाबा पेपर मिलदेखि टपराटोल हुँदै जल्पापुर नरसिंह जोड्ने झुलेङ्गे पुलसम्मको झन्डै ३ हजार ५ सय मिटर सडक कालोपत्रे भएपछि गाउँलेहरूको यात्रा मात्र होइन, जीवनशैली नै सहज बन्दै गएको छ।
गाउँपालिकाको आफ्नै स्रोतमा आधारित यो परियोजनामा झन्डै ३ करोड ८४ लाख रुपैयाँ खर्च भएको छ। एच एम समीक्षा जेभी कन्ट्रक्सन प्रा.लि.ले निर्माण कार्य सम्पन्न गरेको यस सडकले गाउँका जनताको दैनिकीमा उल्लेखनीय परिवर्तन ल्याएको छ।
गाउँपालिका अध्यक्ष अजमल अख्तर आजाद भन्छन्, “हामी स्थानीय सरकार हौं, तर हाम्रो सोच राष्ट्रिय हो। जनताको आवश्यकता बुझ्दै, पारदर्शिता र सहभागिताको आधारमा पूर्वाधार विकासलाई गति दिइरहेका छौं। कालोपत्रे सडकले आज हाम्रो प्रतिबद्धतालाई भौतिक स्वरूप दिएको छ।”

यस योजनाले केवल एउटा सडक निर्माण गरेको होइन, बरु त्यसले गाउँका सपना, अपेक्षा र सम्भावनाहरूलाई पनि उज्यालोमा ल्याएको छ। खासगरी जल्पापुर र बविया क्षेत्रका बासिन्दा यसबाट अत्यन्त लाभान्वित भएका छन्। पहिले हिलो, धुलो र झोलुङ्गे बाटाको पीडा सहन बाध्य थिए, अहिले भने उनीहरूलाई गाउँपालिका कार्यालयसम्म पुग्न अब १५ मिनेट पनि लाग्दैन।
स्थानीयवासी ६५ वर्षीया अमृता देवी यादव भन्छिन्, “पहिले त हस्पिटल जान पनि गाडी भेटिन्नथ्यो, बाटो नै थिएन। अहिले एम्बुलेन्स सिधा घरमै आउँछ। बाटो बनेपछि गाउँ पनि बाँचेजस्तो भयो।”

गाउँपालिकाले हालसम्म हुलाकी राजमार्गदेखि भारतीय सिमानासम्म ३.७ किलोमिटर, महेन्द्र राजमार्गदेखि टपराटोल हुँदै झुलेङ्गे पुलसम्म ३.५ किलोमिटर, र लवटोलिया–वडा नं. ३ कार्यालयसम्म १.१ किलोमिटर सडक कालोपत्रे गरिसकेको छ। त्यस्तै, चिरौली–प्रकाशपुर जोड्ने ४.५ किलोमिटर सडकको ८० प्रतिशत निर्माण कार्य सम्पन्न भइसकेको प्राविधिक सुनिल विक्रम शर्माले जानकारी दिए। बाँकी कार्य जेठ महिनाभित्र सम्पन्न हुने अपेक्षा गरिएको छ।
यसैगरी, सामवाला चोकदेखि सुनसरी खोला हुँदै बाबा पेपर मिल मार्ग भएर महेन्द्र राजमार्ग जोडिने वैकल्पिक मार्ग पनि कालोपत्रे भएपछि देवानगञ्ज, बर्जु, र हरिनगरका स्थानीयहरूलाई कोशी टप्पु तथा कोशी ब्यारेजको अवलोकनमा समेत सहजता भएको छ। अब इनरुवा हुँदै लामो घुम्ती लिनुपर्ने बाध्यता हटेको छ, जसले यात्रालाई किफायती, समयमैत्री र सहज बनाएको छ।
अध्यक्षको दिर्घदृष्टि र जनताको सहभागिता अध्यक्ष आजादको स्पष्ट अठोट  “गाउँका दुर्गम बस्ती, खोला किनार र सीमान्त बस्तीहरूलाई यातायात सञ्जालले जोड्नु हाम्रो अबको प्रमुख लक्ष्य हो। खाल्डाखुल्डीले भरिएको बाटो होइन, दीर्घकालीन मर्मत सम्भारसहितको पूर्वाधार हामी बनाउनेछौं।”
उनका अनुसार, गाउँपालिकाले आगामी वर्षहरूमा पूर्वाधार योजनाहरूमा व्यापक लगानी गर्दै जनतासँग सल्लाह र समन्वयमा काम अघि बढाउने छ। सडक मात्र होइन, त्यो सडकले शिक्षा, स्वास्थ्य, व्यापार र पर्यटनको ढोका खोल्ने विश्वास अध्यक्षले व्यक्त गरेका छन्।

यता बाबा पेपर मिलदेखि झुलेङ्गे पुलसम्मको कालोपत्रे मार्ग केवल गिट्टी र तारको बाटो होइन, यो आशाको बाटो हो। गाउँपालिकाको दिर्घदृष्टि, नेतृत्वको प्रतिबद्धता र जनताको सक्रिय सहभागिताले गाउँलाई बिस्तारै समृद्धिको गोरेटोबाट राजमार्गतर्फ डोर्याउन थालेको छ।