इनरुवा । सुनसरीको भोक्राहा नरसिंह गाउँपालिकामा कार्यस्थलमा आधारित तथा जीवन उपयोगी सीप विकास अन्तर्गत डकर्मी (मेसन) तालिम सम्पन्न भएको छ। प्रधानमन्त्री रोजगार कार्यक्रम अन्तर्गत सञ्चालित उक्त तालिम “रोजगारीकालागि रुपान्तरण पहल आयोजना” मार्फत सञ्चालन गरिएको हो।
गाउँपालिकाका विभिन्न वडाबाट छनौट गरिएका ४० जना युवाहरुले ५० दिनको तालिममा सहभागी भएका थिए। जसमध्ये ४० दिन डकर्मी सम्बन्धी प्राविधिक सीप प्रदान गरियो भने बाँकी १० दिन जीवन उपयोगी विषयहरूमा जानकारी दिइयो।
कार्यक्रमको समापन तथा प्रमाणपत्र वितरण समारोहमा प्रमुख प्रशासकीय अधिकृत विनोद कुमार अधिकारीले सहभागीहरुलाई बधाई तथा उज्वल भविष्यको शुभकामना व्यक्त गरे। उनले तालिममार्फत प्राप्त सीप युवाहरूको आत्मनिर्भरता र रोजगारीमा टेवा पुग्ने विश्वास व्यक्त गरे।
गाउँपालिका अध्यक्ष अजमल अख्तर आजादले तालिममा सहभागी युवाहरुलाई बधाई दिंदै भने, “सीप र ज्ञान व्यक्ति जीवनका अमूल्य सम्पत्ति हुन्। गाउँपालिकाले युवालाई रोजगारीको मूलधारमा ल्याउन विविध सीपमूलक कार्यक्रम अगाडि बढाउँदै आएको छ। आजको युगमा दक्षता बिना अवसर पाउन कठिन छ, सीपयुक्त युवा नै समृद्धिको आधार हुन्।”
उनले थपे, “विदेश जाने युवा यदि दक्ष भएर जान्छन् भने उनीहरू ठगिने जोखिमबाट बच्न सक्छन्, आत्मविश्वासी बन्न सक्छन् र अधिक आम्दानी गर्न सक्छन्। यसैले हामीले गाउँमै सीप विकासमा जोड दिइरहेका छौं।”
उपाध्यक्ष सुनिता कुमारी उरावँ, वडा अध्यक्षहरू, वडा सदस्य, कार्यपालिका सदस्यहरू, शाखाका कर्मचारी र तालिमका सहभागीहरूको उपस्थिति रहेको कार्यक्रमको अध्यक्षता अध्यक्ष आजाद स्वयंले गरेका थिए।
तालिम कार्यक्रमको प्राविधिक सहयोग नेशनल स्किल डेभलपमेन्ट एण्ड रिसर्च सेन्टर प्रा. लि., इनरुवा, सुनसरीले प्रदान गरेको थियो। सीटीईभीटी (CTEVT) सम्बन्धन प्राप्त यस संस्थाले तालिम अवधिभर दक्ष प्रशिक्षकहरूमार्फत प्रशिक्षण सञ्चालन गरेको थियो। कार्यक्रममा सहभागीहरुलाई प्रमाणपत्र वितरण गरिएको थियो भने कार्यक्रम गाउँपालिका सभाहलमा सम्पन्न भएको थियो। कार्यक्रमको सञ्चालन तथा सहजिकरण रोजगार सहायक पारस दाहालले गरेका थिए।
Discussion about this post