मधुवनमा ६ दिनको बाच्छीले दियो दूध, पशु विज्ञ समेत चकित

इनरुवा — सुनसरीको बराहक्षेत्र नगरपालिका–११ स्थित मधुवन टोलमा एउटा यस्तै घटना घट्यो, जसले विज्ञान, समाज र परम्परागत धारणामा बहसको नयाँ ढोका खोलेको छ । हरिलाल मेहता नामका एक सामान्य किसानको गोठमा जन्मिएको एउटा बाच्छी अहिले असामान्य क्षमताको प्रतीक बनेकी छ — जन्मेको केवल छ दिनमै दूध दिन थालेपछि ।

गत बैशाख ३१ गते, हरिलालले पालेको जर्सी गाईले दोस्रोपटक बाच्छी जन्माइन् । सुरुवाती दिनहरूमा त्यो बाच्छी अरू सधैंका जस्तै देखिएकी थिई । तर, छैटौँ दिनदेखि एकाएक उसमा भएको परिवर्तनले सम्पूर्ण गाउँ अचम्भित बनायो । बाच्छीको स्तन भाग (फाचो) अस्वाभाविक रूपमा विकास हुन थाल्यो र थुनबाट दूध झर्ने संकेत देखिन थाले ।

किसान मेहता शुरुमै यस दृश्यलाई आँखा झुक्याउने भ्रम ठान्थे । तर, जब छरछिमेक, पशुपालक साथीहरू तथा सामाजिक सञ्जाल प्रयोगकर्ताहरूले भिडियोमार्फत उक्त दृश्य अवलोकन गर्न थाले, तब त्यो घटना केवल आश्चर्यको विषय मात्र रहेन — त्यो बन्यो चकित पार्ने चमत्कार ।

सुनसरीस्थित भेटेरिनरी अस्पताल तथा पशु सेवा विज्ञ केन्द्रका सहायक पशु चिकित्सक चिनेश्वर मेहताको नेतृत्वमा प्राविधिक टोली उक्त गोठमा पुग्यो । टोलीमा केन्द्र प्रमुख डा. मनोज महत्तोसहितका विज्ञहरू सहभागी थिए । निरीक्षणपछि पुष्टि भयो कि बाच्छीको स्तन भाग साँच्चै असामान्य रूपमा विकसित भइसकेको छ र थुनबाट दूध निस्किएको छ । बाच्छी मात्र होइन, आम गाई पनि पूर्णरूपमा स्वस्थ देखिएका थिए ।

सहायक पशु चिकित्सक मेहताका अनुसार, यस्तो घटना पशु विज्ञानको इतिहासमा अति दुर्लभ हो । उनले भने, “यो बाच्छी कृत्रिम गर्भाधानबाट जन्मिएकी हुन् । मात्र छ दिनको उमेरमा दूध दिनु सामान्य कुरै होइन — यो चमत्कार हो । वैज्ञानिक परीक्षण र गहिरो अनुसन्धानको आवश्यकता छ ।”

विज्ञ टोलीले यो विषयको विस्तृत विवरण प्रदेशस्तरीय तथा संघीय पशु सेवा विभागमा प्रतिवेदन स्वरूप पठाइसकेको छ । विभागले पनि घटनालाई गम्भीरतापूर्वक लिँदै थप अनुसन्धानको तयारी गरिरहेको छ ।

सामाजिक सञ्जालमा उक्त घटनाको भिडियो भाइरल भएसँगै जनमानसमा उत्सुकता, आस्था र आशंका एकसाथ जन्मिएका छन् । कतिपयले यसलाई प्राकृतिक चमत्कारको संज्ञा दिइरहेका छन्, भने केहीले वैज्ञानिक आधारमा पुष्टि नहुनुन्जेल कुनै निष्कर्षमा पुग्न नहुने तर्क गरेका छन् ।

पशु अधिकारकर्मीहरू तथा अनुसन्धानमा संलग्न विज्ञहरू सावधानीपूर्वक अध्ययन गर्नुपर्ने मत राख्छन् । किनभने यस्ता असाधारण घटनाहरू सत्यता, सम्भाव्यता र वैज्ञानिक नियमसँग मेल खानुपर्छ ।

मधुवनको एक सामान्य गोठमा जन्मिएकी बाच्छी अहिले असामान्य चर्चा र अनुसन्धानको केन्द्र बनिसकेकी छिन् । यो घटना केवल एक किसानको अनुभव मात्र होइन — यो नेपाली पशुपालन इतिहासको पानामा लेखिनलायक एउटा असामान्य क्षण हो, जसले विज्ञान, समाज र चेतनाको नयाँ अध्याय सुरू गरिरहेको छ ।