विराटनगर — कोशी प्रदेशसभा सोमबार असाधारण रूपमा गर्मायो जब पूर्वमुख्यमन्त्री केदार कार्कीले सदनमै खरो अभिव्यक्ति दिँदै प्रदेश सरकार र सुरक्षा प्रशासनमाथि गम्भीर आरोपहरू लगाए। उनले प्रहरी, गृह मन्त्रालय र अख्तियार दुरुपयोग अनुसन्धान आयोगबीचको समन्वित भ्रष्टाचारको संरचना रहेको दाबी गर्दै “एसपी साब, अस्तिको पाँच लाख कहाँ गयो?” भनेर सोझै प्रश्न तेस्र्याए।
कार्कीको आरोपअनुसार मोरङको जोगबनी नाका भ्रष्टाचारको केन्द्रबिन्दु बनेको छ। उनका अनुसार दिनभर व्यापारीलाई तर्साउने, राति गैरकानुनी ढंगले ट्रक छिराउने, र त्यसबाट असुलिएको पैसा माथिल्लो तहसम्म पुर्याउने कार्यमा प्रहरी प्रशासन संलग्न छ। “रक्षक नै भक्षक भएपछि सुशासनको कल्पना कसरी गर्ने?” भनेर उनले प्रदेशसभाको मर्यादा नै हल्लाउने अभिव्यक्ति दिए।
पूर्वमुख्यमन्त्री कार्कीले आफ्नो अभिव्यक्तिमा केवल प्रहरी मात्र होइन, अख्तियार र न्यायालयसम्मलाई समेत लक्षित गरे। “ललिता निवास प्रकरणका आरोपीहरू संरक्षण पाउँछन्, अदालतमा पैसा तिर्न सक्नेले मात्रै न्याय पाउँछ,” भन्दै उनले भ्रष्टाचारको संरचनागत जालोप्रति गम्भीर आपत्ति जनाए।
यसअघि सांसद डा. विरेन्द्र महतोले आफ्ना छोराको समकक्षता बनाउन ५ हजार रुपैयाँ घुस दिएको स्वीकारोक्ति संसदमा चर्चाको विषय बनेको थियो। त्यसैप्रकार, अहिले कार्कीको अभिव्यक्तिले नयाँ छानबिन समिति गठनको माग फेरि बलियो बनेको छ।
स्वास्थ्य, स्थानीय निकाय र विपद राहतमा समेत भ्रष्टाचारको आरोप
कार्कीले प्रदेश सरकारका अन्य क्षेत्रहरूमा समेत गम्भीर बेथिति भएको आरोप लगाए। हरैंचाको एक स्वास्थ्य चौकीमा एकै रातमा बीमा कार्डबाट २९ हजार रुपैयाँ दाबी गरिएको प्रसंग उल्लेख गर्दै उनले सरकारी स्वास्थ्य प्रणालीमा व्यापक अनियमितता रहेको बताए। “नोबेल अस्पतालमा एक रातमा ३ हजार लाग्छ, तर सरकारी चौकीमा त्यति नै समयमा २९ हजार?” उनले प्रश्न गरे।
स्थानीय निकायहरूमा ठेक्का–पट्टामा संलग्न जनप्रतिनिधिहरूले सुशासनको कल्पना नै धरापमा पारेको उनको भनाइ थियो। “जब जनप्रतिनिधि स्वयं ठेकेदार हुन्छन्, तब भ्रष्टाचार रोक्न सकिन्न,” भन्दै उनले विराटनगर महानगरलाई विशेष रूपमा आलोचना गरे।
मुख्यमन्त्रीमाथि पनि प्रश्न, ‘राहत के कार्यकर्तालाई?’
मुख्यमन्त्रीको विपद् व्यवस्थापन कोष प्रयोगको विषयमा पनि कार्कीको टिप्पणी चर्को थियो। उनले बुढीगंगा–२ मा राहत वितरणको घटनालाई उदाहरण दिँदै सोधे — “मुख्यमन्त्री आफै पुगे, तर राहत पार्टी कार्यकर्तालाई भयो कि पीडितलाई?” यसले सरकारको जवाफदेहिता र निष्पक्षताको सवाल फेरि उठाएको छ।
“म सुकरातझैं विषपान गर्न तयार छु, तर भ्रष्टाचारसँग सम्झौता छैन”
कार्कीले आफ्नो मन्तव्यको अन्त्यमा कुनै पनि परिणाम भोग्न तयार रहेको धारणा राखे। “म जेल जान तयार छु, सुकरातझैं विषपान गर्न तयार छु, तर भ्रष्टाचारसँग सम्झौता गर्ने छैन,” भन्दै उनले ईमानदारीको सन्देश दिए।
यता केदार कार्कीको यो अभिव्यक्ति कोशी प्रदेशको राजनीतिमा एक नयाँ बहसको सुरुवात भएको छ। प्रहरीदेखि लिएर मन्त्री, अख्तियारदेखि अदालतसम्म, अनि स्थानीय निकायदेखि स्वास्थ्य चौकीसम्म फैलिएको भनिएको भ्रष्टाचारमाथि छानबिन हुने हो वा फेरि सामान्य खबरझैं भुलिने हो — अब प्रदेश सरकारको जवाफ र निर्णयमाथि सिंगो प्रदेशले नजर राखेको छ।
Discussion about this post