इनरुवा । सुनसरीको भोक्राहा नरसिंह गाउँपालिका–३ स्थित फुलचोकमा सोमबार दिउँसो भएको एक दर्दनाक सडक दुर्घटनामा दुई युवाको ज्यान गएको छ भने अर्का एकजना गम्भीर घाइते भएका छन्।
प्रदेश १–०२–००३ त ९०२ नम्बरको ट्र्याक्टरले पूर्वपश्चिम राजमार्गमा तीन जना सवार मोटरसाइकल (प्रदेश १–०२–०५५ प ६२९६ नम्बर) लाई ठक्कर दिँदा सो दुर्घटना भएको जिल्ला प्रहरी कार्यालय सुनसरीले जनाएको छ।
दुर्घटनामा इनरुवा नगरपालिका–१०, जाल्पापुरका २० वर्षीय सर्फराज अन्सारी र हरिनगर गाउँपालिका–१ का महजित अन्सारीको उपचारको क्रममा सप्तकोशी न्युरो अस्पतालमा मृत्यु भएको हो।
मोटरसाइकलमा सवार अर्का युवक, इनरुवा–१० जाल्पापुरका २१ वर्षीय साहेब अन्सारी गम्भीर घाइते भएका छन्। हाल उनको सोही अस्पतालमा उपचार भइरहेको जिल्ला प्रहरी कार्यालयका प्रवक्ता प्रहरी नायब उपरीक्षक (डिएसपी) योगराज खतिवडाले जानकारी दिए।
दुर्घटनापछि ट्र्याक्टर चालक, भोक्राहा नर्सिङ–३ निवासी ४६ वर्षीय सुब्दीराम चमारलाई प्रहरीले नियन्त्रणमा लिई थप अनुसन्धान अगाडि बढाएको छ।
प्रहरीका अनुसार ती तीनै जना कुनै कामका सिलसिलामा मोटरसाइकलमा सँगै गइरहेका थिए। ट्र्याक्टरको तीव्र गतिका कारण अनियन्त्रित भएर मोटरसाइकलमा ठक्कर दिँदा यो ज्यानलिने दुर्घटना भएको अनुमान गरिएको छ।
दुर्घटनासँगै स्थानीयवासी र सवारीसाधन चलाउनेहरुबीच सडक सुरक्षा र ट्राफिक नियम पालनामा गम्भीर ध्यान दिनुपर्ने माग पनि बढेको छ।
Discussion about this post