इनरुवा । सुनसरीको भोक्राहा नरसिंह गाउँपालिकाको आयोजनामा १८ औं गणतन्त्र दिवसको अवसरमा दीप प्रज्वलन कार्यक्रम एक विशेष र भावनात्मक माहोलमा सम्पन्न गरिएको छ। गाउँपालिका कार्यालय परिसरमा आयोजित उक्त कार्यक्रमले गणतन्त्रको गौरवपूर्ण इतिहास र वर्तमान सन्दर्भमा नागरिक चेतना जगाउने उद्देश्य बोकेको थियो।
कार्यक्रममा गाउँपालिकाका अध्यक्ष अजमल अख्तर आजादको प्रमुख आतिथ्यता रहनुका साथै वडा अध्यक्षहरू, प्रमुख प्रशासकीय अधिकृत, विभिन्न राजनीतिक दलका प्रतिनिधिहरू, समाजसेवी, स्थानीय बुद्धिजीवी, सुरक्षा निकाय, शिक्षक–विद्यार्थी, महिला समूह तथा सञ्चारकर्मीहरूको उल्लेखनीय उपस्थिति थियो।
समारोहको औपचारिक सुरुआत दीप प्रज्वलनबाट गरिएको थियो। उक्त दीप प्रज्वलनले लोकतन्त्र, गणतन्त्र र शान्तिको प्रकाश फैलाउने सन्देश दिएको सहभागीहरूले बताएका थिए।
गाउँपालिका अध्यक्ष अजमल अख्तर आजादले दीप प्रज्वलनपश्चात सम्बोधन गर्दै गणतन्त्र प्राप्तिका लागि नेपाली जनताले गरेको संघर्ष र बलिदानको स्मरण गर्नुपर्दछ भन्दै सहिदहरूप्रति श्रद्धाञ्जली अर्पण गर्नुभयो। उहाँले भन्नुभयो, “गणतन्त्र केवल राजनीतिक परिवर्तनको उपज होइन, यो जनताको सम्मान, अधिकार र अवसरको सुनिश्चितताको आधार स्तम्भ हो। यसको रक्षा र प्रवर्द्धन हाम्रो सामूहिक कर्तव्य हो।”
अध्यक्ष आजादले अझै पनि धेरै वर्ग, समुदाय र भूगोलसम्म गणतन्त्रको उपलब्धि पूर्ण रूपमा नपुगेको भन्दै समावेशी, समान र न्यायपूर्ण समाज निर्माणका लागि सबै तह र तप्काबाट प्रतिबद्धता आवश्यक रहेको धारणा व्यक्त गर्नुभयो। उहाँले सामाजिक रूपान्तरणका लागि शिक्षा, स्वास्थ्य, रोजगारी र सुशासनलाई प्राथमिकता दिएर अघि बढ्नुपर्नेमा जोड दिनुभयो।
कार्यक्रममा स्थानीय विद्यालयका विद्यार्थीहरूले देशभक्तिपूर्ण गीत तथा कविता प्रस्तुत गरी समारोहलाई झनै भावनात्मक बनाएका थिए। दीप प्रज्वलनपछि राष्ट्रका लागि बलिदान दिने ज्ञात–अज्ञात सहिदहरूको सम्झनामा मौनधारण गरिँदै श्रद्धाञ्जली अर्पण गरिएको थियो।
गाउँपालिकाले यस वर्ष पनि गणतन्त्र दिवसलाई विशेष महत्व दिँदै विविध जनचेतनामूलक, सांस्कृतिक तथा सन्देशमूलक कार्यक्रमहरू आयोजना गर्ने तयारी गरिरहेको छ। यस प्रकारका कार्यक्रमले स्थानीय तहमा लोकतान्त्रिक मूल्य र गणतान्त्रिक चेतनाको विकासमा सहयोग पुग्ने विश्वास गरिएको छ।
कार्यक्रमको समापनमा गाउँपालिकाले सबै उपस्थित सहभागीप्रति आभार व्यक्त गर्दै आगामी दिनमा पनि यस्ता कार्यक्रमलाई निरन्तरता दिइने प्रतिवद्धता जनाएको थियो।
Discussion about this post