सुनसरी — मुस्लिम आयोगका अध्यक्ष महमदीन अलीले बुधबार सुनसरीकाे भोकाहा नरसिंह गाउँपालिकामा औपचारिक अवलोकन तथा परिचयात्मक कार्यक्रम सम्पन्न गरेका छन्।
कार्यक्रमका क्रममा अध्यक्ष अलीले गाउँपालिकाको कार्यशैली, सेवा प्रवाह र भौतिक पूर्वाधारको प्रत्यक्ष निरीक्षण गर्दै स्थानीय सरकारको समावेशी दृष्टिकोणको प्रशंसा गरे। उनले गाउँपालिकाले जनमुखी तथा सेवा–मैत्री प्रणालीमा आधारित भएर सबै समुदायलाई लक्षित सेवा प्रदान गरिरहेको बताए।
“स्थानीय सरकार नागरिकको ढोका–ढोकासम्म पुग्ने तह हो,” अध्यक्ष अलीले भने, “ पालिकाहरूले मुस्लिम समुदायसहित सबै नेपालीका लागि समान पहुँच सुनिश्चित गर्न सशक्त भूमिका खेलेका छन्।”
उनले गाउँपालिका भवन, कार्यालय व्यवस्थापन, नागरिक सेवा डेस्क, सूचना प्रविधि कक्ष, वडा कार्यालयलगायत संरचनाको अवलोकन गरे। साथै, मुस्लिम आयोगले शिक्षा, स्वास्थ्य, सीप विकास र रोजगारीका क्षेत्रमा स्थानीय सरकारहरूसँग सहकार्य गरेर अघि बढ्ने प्रतिबद्धता जनाए।
गाउँपालिका अध्यक्ष अजमल अख्तर आजादले आयोग अध्यक्ष अलीलाई स्वागत गर्दै पालिकाको स्थापना कालदेखि नै मुस्लिम समुदायको हितमा कार्यक्रम सञ्चालन हुँदै आएको उल्लेख गरेका थिए । “मुस्लिम आयोगको सरोकार र साथले हाम्रो प्रयासलाई थप ऊर्जा मिलेको छ,” अध्यक्ष आजादले भने, “हामी समावेशी विकासप्रति प्रतिबद्ध छौं।”
उपाध्यक्ष सुनिता कुमारी उराँवले गाउँपालिकाले सबै जात–जाती, वर्ग र समुदायका लागि लक्षित कार्यक्रमहरू सञ्चालन गर्दै आएको जानकारी दिइन्। प्रमुख प्रशासकीय अधिकृत विनोद अधिकारीले सेवा प्रवाह, बजेट परिचालन तथा आगामी योजनाबारे संक्षिप्त प्रस्तुति दिएका थिए।
कार्यक्रममा वडा अध्यक्षहरू, महिला प्रतिनिधि, स्थानीय अगुवा र कर्मचारीहरूको उल्लेखनीय उपस्थिति रहेको थियो। गाउँपालिकाले अध्यक्ष अलीलाई औपचारिक स्वागत र कृतज्ञता व्यक्त गरेको थियो।
कार्यक्रमपछि सञ्चारकर्मीहरूसँग प्रतिक्रिया दिँदै अध्यक्ष अलीले मुस्लिम समुदायको शिक्षा, स्वास्थ्य, नागरिक अधिकार र समावेशी सेवाको प्रवर्द्धनमा आयोग क्रियाशील रहेको बताए। उनले स्थानीय सरकारहरूसँगको सहकार्यलाई अझ सुदृढ बनाइने स्पष्ट पारे।
भ्रमणका क्रममा स्थानीय जनप्रतिनिधि तथा नागरिकहरूले आयोग समक्ष आफ्ना समस्या, सुझाव र अपेक्षाहरू राखेका थिए। अवलोकन कार्यक्रमले स्थानीय तह र आयोगबीचको सहकार्यलाई थप मजबुत बनाउने अपेक्षा गरिएको छ।
Discussion about this post