किसानलाई राहत दिन दबाब, मुख्यमन्त्रीलाई १० बुँदे ध्यानाकर्षण पत्र बुझाउँदै

जनकपुरधाम । मधेश प्रदेशमा उत्पन्न सुख्खा र जल संकटको मार खेपिरहेका किसानलाई राहत दिनुपर्ने मागसहित प्रतिपक्षी दलहरूले मधेश सरकारका मुख्यमन्त्री सतिश कुमार सिंहलाई १० बुँदे ध्यानाकर्षण पत्र बुझाएका छन्।

पूर्वमुख्यमन्त्री तथा जसपा, नेपाल संसदीय दलका नेता सरोज कुमार यादवको नेतृत्वमा पुगेको प्रतिनिधिमण्डलमा विभिन्न दलका नेताहरू सहभागी थिए। ध्यानाकर्षण पत्रमार्फत प्रदेश सरकारले सुख्खा क्षेत्र घोषणा गरेको र संघीय सरकारले विपद् संकट क्षेत्र मानेको भए पनि किसानका समस्या समाधान गर्न कुनै ठोस कदम नचालेको भन्दै गम्भीर ध्यानाकर्षण गराइएको छ।

जसपा, नेपालका प्रदेश प्रमुख सचेतक रामअशिष यादवका अनुसार सो पत्रमा सिंचाइ सुविधाको अभाव हटाउने, कृषि ऋणमा छुट दिने, खानेपानी संकट टार्ने, चुरे क्षेत्रको संरक्षण गर्ने, अवैध गिटी–बालुवा उत्खनन र क्रसर उद्योग नियन्त्रण गर्ने, भूमिगत सिंचाइका लागि अनावश्यक लालपुर्जा माग हटाउने तथा अधुरा सतही र भूमिगत सिंचाइ योजनालाई सञ्चालनमा ल्याउनुपर्ने लगायतका माग समेटिएको छ।

प्रतिनिधिमण्डलमा मधेश प्रदेशका प्रथम मुख्यमन्त्री लालबाबु राउत, नेकपा माओवादी केन्द्रका नेता युवराज भट्टराई, नेकपा एसका कनिष पटेल, राप्रपाकी कन्चन बिच्छा, संघीय समाजवादी पार्टीकी बिमला अन्सारी, एसका प्रमुख सचेतक जवाहरलाल कुसबाहा, प्रदेश मामिला समितिका सभापति रत्नेश्वरलाल गोइतलगायतको सहभागिता थियो।

प्रतिपक्षी दलहरूले किसानको पीडा कम गर्न तत्काल राहतको व्यवस्था गर्न र दीर्घकालीन समाधानमा सरकार गम्भीर हुनुपर्ने आवश्यकता औंल्याएका छन्।