इनरुवा – सुनसरीको भाेक्राहा नरसिंह गाउँपालिकाले यस वर्षको महान चाड बडा दशैं (विजयादशमी) का अवसरमा सम्पूर्ण गाउँबासी तथा देश–विदेशमा रहेका नेपाली दाजुभाइ दिदीबहिनीहरूलाई हार्दिक शुभकामना प्रेषण गरेको छ।
पालिका अध्यक्ष अजमल अख्तर आजादले सोमबार जारी गरेको शुभकामना सन्देशमा दशैंलाई सत्यको विजय र असत्यको पराजयको प्रतीकका रूपमा वर्णन गर्दै यस पर्वले सामाजिक सद्भाव, आपसी एकता, धार्मिक सहिष्णुता र राष्ट्रिय पहिचानलाई बल पुर्याउने उल्लेख गरेका छन् ।
सन्देशमा अध्यक्ष आजादले दशैंको समय परिवारभित्र टिका, जमरा, फूलपाती र प्रसाद ग्रहण गर्ने परम्पराले आपसी सद्भाव बढाउने मात्र नभई सांस्कृतिक एकतालाई मजबुत पार्ने विश्वास व्यक्त गरेकाे छ । उनले भने, “हाम्रो मुलुकको विविधताबीचको मेलमिलाप र सहिष्णुता नै हाम्रो बल हो, यसलाई चाडपर्वहरूले अझ सुदृढ पारिरहेका छन्।”
अध्यक्ष आजादले भाेक्राहा नरसिंह गाउँपालिकालाई बहुजातीय, बहुभाषिक र बहुसांस्कृतिक सौन्दर्यले भरिएको समाजको नमूना बताउँदै, सबै चाडपर्वलाई आपसी सम्मान र सहकार्यका साथ मनाउन आग्रह गरेका छन् । उनको भनाइमा, यस वर्षको दशैंले नयाँ उत्साह, जोश र ऊर्जा दिँदै “समृद्ध नेपाल, सुखी नेपाली” को राष्ट्रिय अभियानलाई सफल बनाउन सबै एकताबद्ध हुन जरुरी छ।
भाेक्राहा नरसिंह गाउँपालिकाका अध्यक्ष आजादले सम्पूर्ण नागरिकलाई शान्ति, समृद्धि र प्रगतिका शुभकामना दिँदै चाडपर्वलाई मिलेमतो र सद्भावसहित मनाउन अपिल गरेका छन् ।
Discussion about this post