विराटनगरमा कपडा तस्करी नियन्त्रण , बब्बु अग्रवालको घरपसलमा फेरि छापा

विराटनगर । भारतबाट सुनसरीको बर्जु हुँदै भित्र्याइने तस्करीका कपडामाथि प्रहरीले फेरि कडाइ गरेको छ। यसै क्रममा पुराना तस्करका रूपमा परिचित व्यापारी बब्बु अग्रवालको घरपसलमा मङ्गलबार प्रहरीको विशेष टोलीले छापा हानेको छ।काठमाडौं पठाउन विमानमार्गबाट तयारी गरिएको कपडा विमानस्थलमै नियन्त्रणमा परेपछि प्रहरीले उनलाई निगरानीमा राख्दै घर र गोदाममा समेत छापा मारेको हो। छानबिनका क्रममा ८९ थान कुर्ता–सुरुवाल र ४५ थान ‘उन्यू’ ब्रान्डका कपडा बरामद गरिएका छन्।अग्रवालको व्यवसायमा हरेक वर्ष जाडो सुरु भएलगत्तै प्रहरीको निगरानी बढ्ने गरे पनि तस्करी यथावत् चल्दै आएको स्थानीयको आरोप छ। भन्सारबाट ल्याएको कपडा र क्यारिङमार्फत ल्याइने तस्करीका सामान एउटै ब्रान्डका बनाएर बिल काट्ने गरेको पनि प्रहरीले शंका गरेको छ।छापा चल्नेबित्तिकै अग्रवाल फरार भएका छन् भने कपडा ढुवानीमा प्रयोग भएको एक गाडी प्रहरीले नियन्त्रणमा लिएको छ। रानी नाकामा सशस्त्र प्रहरीको कडाइ बढेसँगै तस्करी सुनसरीतर्फ सर्ने गरेको सुरक्षा निकायको भनाइ छ।
प्रहरीले अहिले घटनाबारे थप अनुसन्धान तीव्र बनाएको छ।