काठमाडौँ । वैकल्पिक राजनीति निर्माणको मुख्य सूत्रधार मानिने विवेकशील साझा पार्टी आइतबार राष्ट्रिय स्वतन्त्र पार्टी (रास्वपा) मा प्रवेश गरेपछि देशभर नयाँ राजनीतिक बहस सुरु भयो । तर साविक अध्यक्ष समीक्षा बास्कोटाले ‘विलय’ होइन, ‘प्रलय’ भएको टिप्पणी गर्दै पार्टीको अस्तित्व सकिएको आरोपलाई अस्वीकार गरिन् ।
राष्ट्रियसभा गृहमा आयोजित एकता समारोहमा पाँचबुँदे सहमतिमा हस्ताक्षर भए पनि विवेकशील साझाको लिगेसी औपचारिक रुपमा नदेखिएको विश्लेषण छ । बास्कोटाले फागुन २१ को निर्वाचनलाई लक्षित गर्दै, “यो विलय होइन, परिवर्तनको प्रलय हो,” भन्दै भविष्यको ‘मतक्रान्ति’ का लागि एकता आवश्यक भएको बताइन् ।
रास्वपाका सचिवालय सदस्य विराजभक्त श्रेष्ठले वैकल्पिक राजनीति अब तेस्रो ध्रुवको रूपमा अघि बढेको दाबी गर्दै पुराना राजनीतिक गठबन्धनले कब्जा गरेको राज्य संयन्त्रलाई चुनौती दिने समय आएको बताए । २०७९ को निर्वाचनमै २१ सिट जित्दै चौथो ठूलो दल बनेको रास्वपा अहिले वडा–वडा सम्म पुगेको छ ।
तर पार्टी अध्यक्ष रवि लामिछाने विभिन्न ठगी र सम्पत्ति–सुद्दीकरण मुद्दामा थुनामा परेका कारण रास्वपाको नेतृत्व क्षमतामा प्रश्न उठेको विश्लेषकहरूको मत छ । जेनजी विद्रोहपछि वैकल्पिक शक्तिको खोजी झनै तीव्र बनेको छ । पुराना दलहरूको पकड कमजोर देखिए पनि हर्क, बालेन, कुलमान, सुदनजस्ता स्वतन्त्र व्यक्तित्वहरू एक ठाउँमा आउन नसक्दा वैकल्पिक धार बलियो बन्न नसकेको टिप्पणी विश्लेषकहरू गर्छन् ।
विश्लेषक डम्बर खतिवडा र भाष्कर गौतम को बुझाइमा — वाम–कांग्रेसको कमजोर प्रदर्शन भए पनि तेस्रो ध्रुव स्थायी रूपमा उभिने अवस्था अझै बनेको छैन । विभिन्न वैकल्पिक समूहहरूबीच देखिएको शक्ति संघर्ष, नेतृत्व विवाद र वैचारिक अस्पष्टताले राजनीतिक शून्यता अझै व्यापक छ ।
यद्यपि जेनजी विद्रोहले पुराना दलहरूलाई हल्लाएको, सुधार नगरे फेरि विकल्प आउन सक्ने चेतावनी दिएको विश्लेषण साझा छ । आगामी निर्वाचनले वैकल्पिक राजनीति साँच्चै तेस्रो ध्रुव बन्छ कि फेरि पुरानै दलहरू फर्किन्छन्, यही अबको मुख्य प्रश्न बनेको छ ।
Discussion about this post