इटहरीको शैक्षिक पहिचानलाई नयाँ उचाइमा पु¥याउने उद्देश्यसहित जनता बहुमुखी क्याम्पसले यही पुस ५ र ६ गते अन्तर्राष्ट्रियस्तरको शैक्षिक सम्मेलन आयोजना गर्ने भएको छ । सामूदायिक स्तरबाट सञ्चालित क्याम्पसमा हुन लागेको यो सम्मेलनको तयारी अन्तिम चरणमा पुगेको छ ।
विश्वविद्यालय अनुदान आयोग नेपालबाट गुणस्तर सुनिश्चितता प्रत्यायान (QAA) प्राप्त गर्न सफल जनता क्याम्पसले स्नातक तहमा बिएड, बिबिएस, बिए, बिआइसिटीई तथा स्नातकोत्तर तहमा एमएड र एमबिएस सञ्चालन गर्दै आएको छ । यसका साथै कक्षा ११ र १२ को शैक्षिक कार्यक्रम पनि निरन्तर सञ्चालनमा छन् ।
कोशी र मधेश प्रदेशका पाँच हजारभन्दा बढी विद्यार्थीलाई उच्च शिक्षा प्रदान गर्दै आएको क्याम्पसले यस सम्मेलनमार्फत शिक्षामा देखिएका समसामयिक चुनौती, नवीन अनुसन्धान पद्धति र अन्तरविषय संवादलाई अघि बढाउने लक्ष्य लिएको छ ।
किन आवश्यक भयो अन्तर्राष्ट्रिय सम्मेलन ?
क्याम्पस सञ्चालक समितिका अध्यक्ष विकास केसीका अनुसार शिक्षण–अध्ययनका शैली समयसँगै परिवर्तन भइरहेका छन् । “विश्वका नामुद शैक्षिक विज्ञसँग प्रत्यक्ष संवाद, अनुसन्धान अनुभव आदान–प्रदान र भविष्यको शिक्षा कुन दिशामा जानुपर्छ भन्ने विषयमा बहस गर्न सम्मेलन अपरिहार्य भयो,” उनी भन्छन् ।
मानविकी, शिक्षा, व्यवस्थापन र विज्ञान संकाय समेटिएको क्याम्पस भएकाले अन्तरविषय छलफल र सहकार्यलाई संस्थागत गर्न सम्मेलन महत्वपूर्ण हुने उनको बुझाइ छ ।
अन्तर्राष्ट्रिय सहकार्यबाट जन्मिएको सोच
भारतका बाबा मस्तनाथ विश्वविद्यालय (हरियाणा) र श्री जे.जे.टी विश्वविद्यालय (राजस्थान)सँग भएको शैक्षिक सम्झौताले क्याम्पसलाई अन्तर्राष्ट्रिय अभ्यास बुझ्ने अवसर दिएको अध्यक्ष केसी बताउँछन् । “विद्यार्थीको रिसर्चदेखि प्राध्यापकको एमफिल र पिएचडीसम्म सहकार्यको ढोका खुलेपछि अन्तर्राष्ट्रिय सम्मेलनले अझ ठूलो उपलब्धि दिने ठानेका हौं,” उनले भने ।
पाँच देशका विज्ञको सहभागिता
सम्मेलनमा अमेरिका, थाइल्याण्ड, बंगलादेश, भारत र नेपालका शैक्षिक विज्ञहरूको सहभागिता रहनेछ । अमेरिकाबाट रोर्जर नामका विज्ञको आगमन तय भइसकेको छ भने नेपालका चर्चित शिक्षा क्षेत्रका विज्ञहरू पनि सहभागी हुनेछन् ।
तयारी र खर्च व्यवस्थापन
खानपान, बसोबास, स्वागत, कार्यक्रम तालिका, प्रचारप्रसारदेखि आर्थिक व्यवस्थापनसम्म सबै उपसमितिले आफ्नो जिम्मेवारी पूरा गरिसकेको क्याम्पसले जनाएको छ । सम्मेलन सफल बनाउन झण्डै ३५ लाख रुपैयाँ खर्च लाग्ने अनुमान गरिएको छ ।
इटहरी उपमहानगरपालिकाले सात लाख रुपैयाँ सहयोग गर्ने घोषणा गरेको छ भने सुनसरीका अन्य स्थानीय तह, वडाहरू र दाताबाट पनि सहयोग प्राप्त भइरहेको छ । सहभागीबाट प्रतिव्यक्ति २ हजार ५ सय रुपैयाँ दर्ता शुल्क लिने निर्णय गरिएको छ ।
इटहरीलाई ‘शिक्षाको हब’ बनाउने लक्ष्य
२०४५ सालमा स्थापना भएको जनता क्याम्पसलाई इटहरीको उच्च शिक्षाको अभिभावक संस्थाका रूपमा लिइन्छ । सम्मेलनले इटहरीलाई ‘शिक्षाको हब’का रूपमा चिनाउन टेवा पुग्ने विश्वास क्याम्पस प्रशासनको छ ।
भावी योजना
अध्यक्ष केसीले आफ्नो कार्यकालमा छात्राबास निर्माण, कम्पाउण्डवाल, ई–लाइब्रेरी, सभाहल निर्माण र नयाँ विषय (बिबिए, बिएचएम) थप्ने योजना अघि बढाइएको जानकारी दिए । “सस्तो, शुलभ र गुणस्तरीय शिक्षा नै हाम्रो मूल लक्ष्य हो,” उनले भने ।
समुदायलाई अपिल
“यो सम्मेलन केवल क्याम्पसको मात्र होइन, समग्र इटहरीकै गौरवको कार्यक्रम हो,” भन्दै अध्यक्ष केसीले सम्मेलनलाई सभ्य र भव्य रूपमा सम्पन्न गर्न सम्पूर्ण समुदाय, सरोकारवाला र शैक्षिक व्यक्तित्वहरूलाई सहयोगका लागि अपिल गरेका छन् ।
Discussion about this post