निर्वाचन आयोगले सामाजिक अध्ययन शिक्षकहरूका लागि नयाँ “निर्वाचन शिक्षा प्रवर्द्धन स्रोत पुस्तिका, २०८२” सार्वजनिक गरेको छ। यस पुस्तिकामा ‘निर्वाचन शिक्षा तथा सूचनाको विस्तार स्वतन्त्र र निष्पक्ष निर्वाचनको पूर्वाधार’ भन्ने नारालाई मुख्य आधार बनाइएको छ। आयोगले यस सामग्रीलाई आफ्नो वेबसाइटमार्फत उपलब्ध गराएको छ।
पुस्तिकामा सातवटा मुख्य भाग छन्। पहिलो भागमा लोकतन्त्र र संविधानको बारेमा जानकारी दिइएको छ। दोस्रो भागले निर्वाचन र राजनैतिक दलसम्बन्धी व्यवस्थाबारे चर्चा गरेको छ। तेस्रो भागमा निर्वाचन प्रणाली, विभिन्न तहको निर्वाचन र समावेशिताबारे विषय समेटिएको छ।
चौथो भागमा निर्वाचन चक्र र प्रक्रिया, जस्तै मतदान प्रक्रिया, नोटा (नो भोट) र मतगणना सम्बन्धी विवरण राखिएको छ। पाँचौ भागले निर्वाचन व्यवस्थापन गर्ने निकाय र सम्बन्धित कानुनबारे जानकारी दिएको छ। छैठौं भागमा निर्वाचन आचारसंहिताको पालन, अनुगमन र पर्यवेक्षणबारे चर्चा गरिएको छ। अन्तिम सातौं भागमा निर्वाचनका सरोकारवालाहरू, नागरिकको कर्तव्य र अधिकार, शिक्षकको भूमिका, साथै निर्वाचन शिक्षा तथा सूचना केन्द्रको भ्रमणसम्बन्धी विषय समेटिएका छन्।
यो पुस्तिका शिक्षकहरूलाई कक्षा वा समुदायमा नागरिकलाई निर्वाचन शिक्षा दिने क्रममा उपयोगी स्रोत बन्नेछ।
Discussion about this post