सुनसरी ।नपाली कांग्रेसको क्रियाशील सदस्यता नवीकरण प्रक्रिया फेरि लम्बिने संकेत देखिएको छ। तोकिएको समय सकिएको एक साता बितिसक्दा पनि काम पूरा नभएपछि थप ९ दिनको समय दिनेबारे समितिमा सहमति बनेको हो।
पार्टी केन्द्रीय कार्यसमितिले मंसिर १५ गतेको बैठकबाट नवीकरणको अन्तिम म्याद मंसिर २४ तोकेको थियो। तर, सो अवधिमा काम नसकिएपछि क्रियाशील सदस्यता व्यवस्थापन समितिका संयोजक तथा महामन्त्री गगन थापाले केन्द्रीय कार्यसमितिको निर्णय संशोधन गर्दै मंसिर मसान्तसम्म समय थप गरेका थिए।
त्यसपछि पनि प्रक्रिया पूरा हुन नसकेपछि सोमबार राति बसेको समितिको बैठकले पुस ९ गतेसम्म नवीकरण सक्ने गरी समय थप गर्ने विषयमा सहमति जुटाएको हो। यद्यपि, समितिकी सदस्य सीता गुरुङका अनुसार यो औपचारिक निर्णय भने भइसकेको छैन। “पुस ९ गते मध्यान्हसम्म सक्नुपर्छ भन्ने सहमति भएको हो, निर्णय भने भएको छैन,” उनले भनिन्। केही जिल्लाबाट आवश्यक विवरण अझै प्राप्त हुन बाँकी रहेको उनले बताइन्।
समितिका सदस्यहरूका अनुसार नवीकरण प्रक्रियामा सबैभन्दा ठूलो समस्या मधेस प्रदेशमा देखिएको छ। खोटाङमा पार्टी सभापति विष्णु राईमाथि अनुशासनको कारबाही भएकाले त्यहाँ प्रक्रिया नै सुरु हुन सकेको छैन। यस्तै, कर्णाली प्रदेशका कालिकोटसहित दुई जिल्ला, प्यूठान, काठमाडौँ र कास्कीमा पनि नवीकरणले गति लिन सकेको छैन।
सोलुखुम्बुमा भने भौगोलिक विकटताका कारण समस्या उत्पन्न भएको स्रोतको भनाइ छ। यी सबै कारणले गर्दा क्रियाशील सदस्यता नवीकरण प्रक्रिया तोकिएको समयमा टुंगो लाग्न नसकेको कांग्रेसभित्रकै नेताहरू स्वीकार गर्छन्।
Discussion about this post