इनरुवा । विराटनगरस्थित कोशी प्रदेश प्रहरी कार्यालयमा आगामी निर्वाचनलाई केन्द्रमा राख्दै प्रदेशस्तरीय सुरक्षा बैठक तथा अन्तरक्रिया कार्यक्रम आयोजना गरिएको छ। आइतबार आयोजित उक्त कार्यक्रम नेपाल सरकारका श्रम, रोजगार तथा सामाजिक सुरक्षा मन्त्री राजेन्द्र सिंह भण्डारीको प्रमुख आतिथ्यमा सम्पन्न भएको हो।
बैठकमा निर्वाचन लक्षित सुरक्षा योजना, हालको सुरक्षा अवस्था, आवश्यक तयारी तथा व्यवस्थापनका विषयमा विस्तृत छलफल गरिएको थियो। कार्यक्रममा कोशी प्रदेशका प्रमुख सचिव राजेन्द्र कुमार पौडेल, सशस्त्र प्रहरी बल बराह बाहिनी पकलीका सशस्त्र प्रहरी नायव महानिरीक्षक कुमार न्यौपाने, पूर्वी पृतना हेडक्वार्टर इटहरीका महासेनानी नन्दबहादुर गुरुङ, जिल्ला प्रशासन कार्यालय मोरङका प्रमुख जिल्ला अधिकारी युवराज कट्टेल तथा कोशी प्रदेश प्रहरी कार्यालय विराटनगरका तर्फबाट प्रहरी नायव उपरीक्षक रामप्रसाद तिमल्सिनाले सुरक्षा तयारीसम्बन्धी प्रस्तुतीकरण गरेका थिए।
त्यसैगरी कार्यक्रममा कोशी प्रदेश सरकार आन्तरिक मामिला तथा कानून मन्त्रालयका सचिव आस्मान तामाङ, कोशी प्रदेश प्रहरी प्रमुख प्रहरी नायव महानिरीक्षक विनोद घिमिरे, राष्ट्रिय अनुसन्धान विभाग कोशीका अनुसन्धान निर्देशक इन्द्रसिंह लामा, कोशी प्रदेश प्रहरी कार्यालय विराटनगरका प्रहरी वरिष्ठ उपरीक्षक योगेन्द्र सिंह थापासहित जिल्ला सुरक्षा समिति मोरङका पदाधिकारी तथा अन्य प्रहरी अधिकृतहरूको उल्लेखनीय उपस्थिति रहेको थियो।
Discussion about this post