सुनसरी । हरितालिका तीज र चौठचन्द पर्वको अवसरमा भोक्राहा नरसिंह गाउँपालिकाले भाेली भदौ १० गते (मंगलबार ) एक दिन स्थानीय बिदा दिने निर्णय गरेको छ।
गाउँकार्यपालिकाको निर्णय अनुसार बिदाको दिन गाउँपालिकासहितका सबै मातहतका कार्यालय तथा शैक्षिक संस्था बन्द रहनेछन्। तर अत्यावश्यक सेवाहरू भने पूर्ववत रूपमा सञ्चालन हुने पालिकाले जनाएको छ।
गाउँपालिकाबाट जारी विज्ञप्तिमा भनिएको छ, “धार्मिक विविधता, परम्परा र संस्कृतिको सम्मान गर्दै सबैलाई पर्व उत्साहपूर्वक मनाउने वातावरण उपलब्ध गराउन भदौ १० गते स्थानीय बिदा दिइएको हो। यस अवधिमा सेवाग्राहीलाई पर्न सक्ने असुविधा प्रति पालिका परिवार क्षमाप्रार्थी छ।”
गाउँपालिका अध्यक्ष अजमल अख्तर आजादले धार्मिक तथा सांस्कृतिक पर्वहरूले समुदायबीचको एकता, सद्भाव र सहिष्णुतामा टेवा पुर्याउने बताएका छन्। उनले भने, “धार्मिक विविधता हाम्रो साझा सम्पत्ति हो, यसले आपसी सद्भाव र एकता अझ मजबुत बनाउँछ। यस विशेष अवसरमा देश–विदेशमा रहेका सबै आमाबुवा, दाजुभाइ र दिदीबहिनीलाई सुख, शान्ति, समृद्धि र प्रगतिका लागि शुभकामना व्यक्त गर्दछु।”
हरितालिका तीज महिलाहरूले धार्मिक आस्था, पारिवारिक समर्पण र सामाजिक एकताको प्रतीकका रूपमा मनाउने गर्दछन् भने चौठचन्द पर्व विशेष गरी हिन्दु समुदायका महिलाहरूले मनाइने महत्वपूर्ण धार्मिक पर्व हो। दुवै पर्वलाई सम्मानपूर्वक मनाउने अवसर प्रदान गर्ने उद्देश्यले पालिकाले छुट्टीको व्यवस्था गरेको अध्यक्ष आजादले स्पष्ट पारे।
यसअघि पनि पालिकाले स्थानीय सांस्कृतिक तथा धार्मिक पर्वमा स्थानीय बिदा दिँदै आएको छ, जसले सामाजिक सद्भाव र परम्परागत मूल्य–मान्यताको संरक्षणमा योगदान पुर्याउँदै आएको छ। यसैबीच इनरूवा नगरपालिका, दुहबी नगरपालिका, रामधुनी नगरपालिका, काेशी गाउँपालिका , देवानगञ्ज गाउँपालिका, हरिनगर गाउँपालिकाले पनि भाेली मंगलबार १ (एक) दिन स्थानीय बिदा दिएका छन् भने गढी गाउँपालिकाले मंगलबार र बुधबार गरि २ (दुई) दिन स्थानीय बिदा दिइएको छ ।
Discussion about this post