काठमाडौं । प्रहरी निरीक्षकमा २०५१ चैत ५ मा भर्ना भएका उच्चप्रहरी अधिकारीहरू एकपछि अर्को गरी अवकाशमा जाँदैछन् । गएको वैशाखमा प्रहरी अतिरिक्त महानिरीक्षक (एआईजी) द्वय सन्दीप भण्डारी र मीरा चौधरीले अवकाश पाए ।
त्यसको दुई महिनापछि अर्का एआईजी उमेशराज जोशीले गते असार १९ मा अवकाश पाए । उनीहरूसँगै उनकै ब्याची डीआईजीद्वय पोषराज पोखरेल र सुरेन्द्र मैनालीलेसमेत असारमै अवकाश पाए । अवकाशको क्रम जारी छ । एक महिनापछि अर्का एआईजी हाल प्रहरीको केन्द्रीय अनुसन्धान ब्युरो (सीआईबी) मा कार्यरत श्यामलाल ज्ञवालीले पनि अनिवार्य अवकाश पाउँदै छन् ।
कोही उमेरका कारण सेवावधि बाँकी हुँदै अवकाश गए र जाँदैछन् भने कोही तीस वर्षे सेवाधिका कारण अनिवार्य अवकाशमा जाँदैछन् । प्रहरीमा तीन आधारमा अवकाश पाउँछन् । जसमा उमेर, पदावधि र प्रहरीको सेवाअधि गणना हुने गर्छ ।
२०५१ मा भना भएका अधिकारीहरू सेवा अवधि र पदावधि नभई डीआईजी र एआईजीको ५६ वर्षे उमेर हदका कारण अवकाश पाउन लागेका हुन् ।
ज्ञवाली भदौ २५ मा अवकाशमा जाँदै छन् । उनीपछि हाल एआईजीमा बढुवा सिफारिस भएका रामदत्त जोशी कार्तिक १८ गते अवकाशमा जानेछन् । एआईजी किरण बज्राचार्य मंसिर १७ र भीम ढकालले मंसिर २८ मा अवकाश पाउने छन् ।
एआईजीबाहेक डीआईजी केदार ढकाल, राजेश बास्तोला, किरण राणा पनि कार्तिक–मंसिरमा अवकाशमा जाने छन् । उनीहरू प्रहरीको ३० वर्षे सेवाअवधि बाँकी रहँदै अवकाश पाउने छन् ।
प्रहरी अधिकारीहरू प्रहरीको विद्यमान व्यवस्थाका कारण अनुभवी र काम गर्ने जोश–जाँगर हुँदा हुँदै अवकाशमा जानुपर्ने व्यवस्था संशोधन गर्न धारणा राख्दै आएका छन् । अनुभवी पात्रहरू चाँडै अवकाशमा जाँदा राज्यलाई नोक्सान भएको तर्क बेलाबखत आउने गर्छ ।
नयाँ गृहमन्त्री नियुक्ति भए लगत्तै प्रहरी ऐन र नियमावली परिमार्जन आवश्यक भएको धारणा राख्छन् । तर, यसले पूर्णता पाउन सकेको छैन ।
गृहमन्त्री रमेश लेखकले समेत प्रहरी ऐन संशोधनसम्बन्धीको विधेयक एक महिनाभित्र संसदमा पेस गर्ने बताएका छन् । विधेयकमा प्रहरीको ३० वर्षे सेवा अवधि हटाउनेदेखि उमेरहद समेत पुनरावलोकन गरेर प्रस्ताव लिने तयारी गरेको छ ।
त्यसका लागि पूर्वमूख्यसचिव लिलामणि पौडेलसहित पूर्वआईजीसहितको समितिले सुझाव प्रतिवेदन समेत तत्कालीन गृहमन्त्री रवि लामिछानेलाई बुझाएका थिए ।
वैशाखयता अवकाशमा गएका र जान लागेको सबै उच्च अधिकारी हालका प्रहरी महानिरीक्षक (आईजीपी) वसन्तबहादुर कुँवरकै ब्याची हुन् । आईजी कुँवरले भने आउँदो चैतमा प्रहरीको ३० वर्षेसेवा अवधिका कारण अवकाश पाउने छन् । आईजीपी कुँवरका ब्याचका अधिकांश प्रहरी अधिकारी उमेरहदका कारण अवकाशमा जाँदै आएका छन् ।
एक महिनापछि ११ एसएसपी र ३० डीएसपी अवकाशमा
उच्च प्रहरी अधिकारीसँगै उमेर र ३० वर्षे सेवा अवधिका कारण भदौ १६ मा ११ एसएसपीले समेत एक साथ अवकाश पाउँदैछन् ।
उनीहरू ३० वर्षेसेवा अवधिका कारण अवकाशमा जान लागेका हुन् । अवकाशमा जान लागेका एसएसपीहरूमा जीवनकुमार श्रेष्ठ, दिल्लीराज विष्ट, रेवती ढकाल, किसनसिंह थापा, रविकुमार पौडेल, नविनराज राई, वीरबहादुर वली छन् ।
त्यस्तै, चन्द्रदेव राई, दिनेशराज मैनाली, बेलबहादुर पाण्डे र रविन्द्र रेग्मी एकसाथ अवकाशमा जाँदैछन् । एसएसपीबाहेक ३० जना प्रहरी नायव उपरीक्षक (डीएसपी)हरूले समेत अवकाश पाउन लागेका छन ।
उनीहरू समेत ३० वर्षे सेवा अवधिकै कारण भदौ १६ मा अवकाश पाउन लागेका हुन् ।
Discussion about this post