विराटनगर । सुनसरीको इटहरी उपमहानगरपालिका–१२ मा एक फार्मेसी सञ्चालक दम्पती ठूलो परिमाणको लागूऔषधसहित पक्राउ परेका छन्।
गोप्य सूचनाको आधारमा गरिएको संयुक्त अपरेसनपछि प्रहरीले घरमै लुकाएर राखिएका हजारौँ क्याप्सुल–ट्याब्लेट बरामद गरेको हो जिल्ला प्रहरी कार्यालय भोजपुर, इलाका प्रहरी कार्यालय इटहरी र प्रहरी चौकी खनारबाट खटिएको टोलीले ५० वर्षीय नसिब नारायण चौधरीको घरमा छापा मार्दा प्लास्टिकका बोरामा लुकाइराखिएको १९ हजार ८०० ट्रामाडोल क्याप्सुल र ४ हजार डिकोलिक ट्याब्लेट फेला पारेको प्रहरीले जनाएको छ। चौधरी ‘नसिव फार्मेसी’का सञ्चालक हुन्।
फार्मेसी व्यवसायको आवरणमा नियन्त्रित औषध बिक्री–भण्डारण गरिएको प्रारम्भिक अनुसन्धानबाट खुलेको छ। बरामद सामग्रीसहित चौधरी र उनकी श्रीमती सम्झना चौधरीलाई प्रहरीले नियन्त्रणमा लिएर इलाका प्रहरी कार्यालय इटहरीमा थप अनुसन्धान अघि बढाइएको कोशी प्रदेश प्रहरी कार्यालय विराटनगरले जानकारी दिएको छ।
प्रहरीका अनुसार बरामद भएको मात्रा मध्यपूर्वी तराई क्षेत्रमा लागूऔषध ओसारपसारमा संलग्न नेटवर्कको गतिविधिसँग जोडिएको हुनसक्ने आशंका छ। घटनाबारे विस्तृत अनुसन्धान जारी रहेको प्रहरीले बताएको छ।
Discussion about this post